უმცირესობის ერთ-ერთი ლიდერის გიგი წერეთლის განცხადებით, "სასამართლოების შესახებ კანონთან" დაკავშირებით ვენეციის კომისიის დასკვნის გაუთვალისწინებლობამ შესაძლოა, სამი უარყოფითი შედეგი გამოიღოს.
მათ შორის, ოპოზიციონერი დეპუტატი ხაზგასმით აღნიშნავს, ევროკავშირთან ასოცირების ხელშეკრულების გაფორმებაში საფრთხის შექმნას.
"ჩვენი ამოცანაა, მოხდეს შეთანხმება "საერთო სასამართლოების შესახებ კანონთან" დაკავშირებით და გვქონდეს კარგი კანონმდებლობა. ჩვენი წინადადება იყო ასეთი, რომ იუსტიციის უმაღლესი საბჭოს წევრები შეიძლება არ იყვნენ პარლამენტარები, მაგრამ მათ არჩევაში აუცილებლად უნდა მიიღოს მონაწილეობა უმცირესობამ. კარგი იქნება, თუ კვოტების გადანაწილება მოხდება, რომ გადაწყვეტილების მიღებაში მონაწილეობა მივიღოთ. თუ ამ საკითხში უმცირესობის ჩართვა არ მოხდება, ამან შეიძლება სამი უარყოფით შედეგი გამოიღოს. პირველი, დაიწყოს დავა პროფესიული თვალსაზრისით, ასევე დემოკრატიული პრინციპის გათვალისწინებით ეს იქნება უკან გადადგმული ნაბიჯი და რაც მთავარია, ამან შესაძლოა, საფრთხე შეუქმნას ევროკავშირთან ასოცირების ხელშეკრულების გაფორმებას", - განაცხადა გიგი წერეთელმა.
