,,რაიმე ახალ, კონკრეტულ ვარიანტზე შეთანხმება ჯერჯერობით ძალიან შორს არის", _ განაცხადა ჟურნალისტებთან ,,ნაციონალური მოძრაობის" წევრმა პავლე კუბლაშვილმა ,,საერთო სასამართლოების შესახებ" საპარლამენტო უმრავლესობასა უმცირესობას შორის გამართული კონსულტაციის დასრულების შემდეგ.
,,რაიმე ახალ, კონკრეტულ ვარიანტზე შეთანხმება ჯერჯერობით ძალიან შორს არის ჩემი აზრით. კიდევ ერთხელ ხაზი მინდა გავუსვა, რომ ის ვარიანტი, რომელიც ორი მოსმენით მიიღო საქართველოს პარლამენტის უმრავლესობამ აბსოლუტურად დაცილებულია ვენეციის კომისიის რეკომენდაციებს. ვენეციის კომისია პირდაპირ მიუთითებს დასკვნაში, რომ პარლამენტის მიერ ასარჩევი იუსტიციის უმაღლესი საბჭოს წევრების შემთხვევაში ან უნდა იყოს რაც შეიძლება მაღალი კვორუმი, რაც შეადგენს 2/3, ან უნდა იყოს კვოტირება იმისათვის, რომ საპარლამენტო უმცირესობის მონაწილეობა იყოს ამ არჩევნებში არსებითი", -განაცხადა პავლე კუბლაშვილმა.
შეგახსენებთ, რომ ,,საერთო სასამართლოების შესახებ"' კანონპროექტში შესატან ცვლილებებთან დაკავშირებით საპარლამენტო უმრავლესობასა უმცირესობას შორის გამართული შეხვედრა კონკრეტული შედეგის გარეშე დასრულდა.