იუსტიციის სახლში ამ წუთებში "საერთო სასამართლოების შესახებ" კანონპროექტზე საპარლამენტო უმრავლესობასა და უმცირესობას შორის კონსულტაციები მიმდინარეობს.
როგორც შეხვედრიდან გამოსულმა პარლამენტის თავმჯდომარე დავით უსუფაშვილმა აღნიშნა, უმრავლესობის მოტივაცია არ არის ის, რომ სააკაშვილის სასამართლო "ოცნების" სასამართლოდ იქცეს.
მისი თქმით, ძალიან სერიოზული პროგრესია მიღწეული. გუშინ პრემიერ მინისტრსა და უზენაესი სასამართლოს თავმჯდომარეს შორის სატელეფონო საუბარი კიდევ შედგა.
"კიდევ ერთხელ დადასტურდა, რომ შეთანხმება, რომელიც იქნა მიღწეული სასამართლოს თავმჯდომარესა და სასამართლო ხელისუფლების წარმომადგენლებთან, არის ძალაში და შესაბამისადდ, იუსტიციის საბჭოს დაკომპლექტების თუ იუსტიციის საბჭოსთან დაკავშირებული ყველა ის საკითხი, რაც ეხება მოსამართლეთა კონფერენციას, დღეს არსებული წევრების უფლებამოსილების საკითხებს და ყველა სხვა თემას ეს შეთანხმება ძალაშია", - განაცხადა უსუფაშვილმა.
მისი თქმით, ეს შეთანხმება ასახულია კანონპროექტის არსებულ ვერსიაში, რომელსაც ბოლომდე მიიყვანენ.
რაც შეეხება კანონპროექტის მეორე ნაწილს, უსუფაშვილის განცხადებით, პარლამენტის 6 წევრის არჩევის საკითხზე უმცირესობის წარმომადგენლებთან კონსულტაციები მიმდინარეობს.
"უმრავლესობის პოზიცია უცვლელია. ჩვენ ვენეციის კომისიის დასკვნების სრულად გათვალისწინებით ვაპირებთ ამ საკითხის მოგვარებას", - აღნიშნა უსუფაშვილმა.
"საერთო სასამართლოების შესახებ" კანონპროექტს დეპუტატებმა კენჭი 3 აპრილს უნდა უყაროს.