შვეიცარიის ელჩი საქართველოში გიუნტერ ბეხლერი პრემიერ-მინისტრ ბიძინა ივანიშვილს მიმართავს და აცხადებს, რომ ზოგიერთი ევროპარლამენტარის ბოლოდროინდელი განცხადებები საქართველოს პოლიტიკურ სინამდვილეს არ შეესაბამება.
როგორც ბიძინა ივანიშვილისადმი გაგზავნილ ღია წერილშია აღნიშნული, ელჩს წერილის დაწერისკენ ზოგიერთი ევროპარლამენტარის უპრეცედენტო და პარტიულმა განცხადებებმა უბიძგა, რომელის როგორც არჩევნებამდე, ასევე არჩევნების შემდეგ კეთდება.
წერილის თანახმად, ის, როგორც საქართველოს მეგობარი და ანალიტიკოსი, აცხადებს, რომ მსგავსი მიმართვები, წერილები და განცხადებები სრულიად საქართველოში პოლიტიკურ რეალობას არ შეესაბამება.
"როგორც პრემიერ-მინისტრი, თქვენ ალბათ, ვალდებული ბრძანდებით, მკაფიოდ უპასუხოთ ასეთ ცრუ ბრალდებებს საქართველოს ახალი და კანონიერად არჩეული ხელისუფლების წინააღმდეგ, მაგრამ ვიტყოდი, რომ არც კი ღირს პასუხის გაცემა ასეთ ზედაპირულ შეფასებებსა და როგორც ჩანს, შეთანხმებულად წარმოებულ პროპაგანდაზე ზოგიერთი შეცდომაში შეყვანილი ევროპარლამენტარის მხრიდან", - აცხადებს შვეიცარიის ელჩი.
მისივე თქმით, მეტად საინტერესოა, რამდენად კარგად აითვისა "ევროპის სახალხო პარტიის" ზოგიერთმა წევრმა საბჭოთა სტილის პროპაგანდისტული მეთოდები.
ელჩის განცხადებით, საქართველო ბევრად უფრო თავისუფალია, ვიდრე ოდესმე ყოფილა და ბევრად უფრო თავისუფალია, ვიდრე მისი მეზობელი ქვეყნები.
"საქართველოს ჯერ კიდევ ახალგაზრდა დემოკრატიამ და ხალხის ნებამ თავი 2012 წლის 1 ოქტომბრის არჩევნებში იჩინა. მოსახლეობის უმრავლესობამ გადაწყვიტა, ხმა მიეცა „ვარდების რევოლუციონერთა" წინააღმდეგ, რადგანაც მათ დემოკრატიის გზას გადაუხვიეს და მოინდომეს შეექმნათ საკმაოდ ავტორიტარული მოდერნიზებული რეჟიმი", - აღნიშნავს ელჩი ღია წერილში.
მისივე განცხადებით, ძნელია არ დაინახო "ნაციონალური მოძრაობის" ხელისუფლების მიღწევები ძველი, კორუფციული სისტემის აღმოფხვრასთან დაკავშირებით.
წერილის თანახმად, ამჟამინდელი ხელისუფლება, რომელმაც დიდი დემოკრატიული მხარდაჭერა მიიღო, ახლა ე.წ. ელიტარული კორუფციის აღმოფხვრის დიდი და რთული ამოცანის წინაშე დგას, გადასახადების გადამხდელთა სახსრების არამიზნობრივი ხარჯვისა და უცხოეთში ფინანსური რესურსების გადაქაჩვის ჩათვლით.
"მე თქვენში ვხედავ ძლიერ პოლიტიკურ ნებას, იხელმძღვანელოთ კანონითა და საერთაშორისო სტანდარტებით. იმისთვის, რომ ხაზგასმული იყოს თქვენი ხელისუფლების მიერ გამოცხადებული შორსმიმავალი რეფორმების დემოკრატიული ხასიათი, სასიცოცხლო მნიშვნელობა აქვს დიალოგს სამოქალაქო საზოგადოებასთან, ბიზნესსექტორთან, საერთაშორისო თანამეგობრობასთან, და ასევე პოლიტიკურ ოპოზიციასთან", - მიმართავს გიუნტერ ბეხლერი ივანიშვილს.
მისივე განცხადებით, მასზე დიდი შთაბეჭდილება მოახდინა რეფორმებმა, რომლებიც ზოგიერთ სამინისტროში მიმდინარეობს. ასევე, მისი თქმით, ხელისუფლებამ მოკლე დროში საქართველოს ჩრდილოელ მეზობელთან ურთიერთობის საუბრის ტონის შეცვლა მოახერხა.
"თქვენ დანიშნეთ სპეციალური წარმომადგენელი, რომელიც რუსეთის წარმომადგენელს უკვე ორჯერ შეხვდა. ისინი ერთმანეთს ენდობიან და შეთანხმდნენ, არ გასცდნენ დაშვებულ ზღვარს და ყურადღება გაამახვილონ განხორციელებად პატარა ნაბიჯებზე", - აღნიშნავს შვეიცარიის ელჩი.
როგორც წერილშია ნათქვამი, ნებისმიერი ხელისუფლება, მსოფლიოს ნებისმიერ კუთხეში უშვებს შეცდომებს, მაგრამ ზოგიერთი მთავრობისათვის შინ კრიზისის მოგვარება იქნებოდა უმჯობესი, ვიდრე სხვებისთვის ამპარტავნული ლექციების წაკითხვა.
"დარწმუნებული ვარ, რომ თქვენ კარგად აცნობიერებთ შეცდომებს, რომლებსაც ადგილი ჰქონდა ბოლო ასიოდე დღის განმავლობაში და არ დაიშურებთ ენერგიასა და სიბრძნეს, რათა ასეთი შეცდომები აღარ განმეორდეს მომავალში", - აცხადებს ბეხლერი.
ამასთან, წერილის ბოლოს, შვეიცარიის ელჩი საქართველოს მოქლაქეებს საქართველოს საშინაო საქმეებში ჩარევისთვის ბოდიშს უხდის და პირობას დებს, რომ ასეთი რამ არ განმეორდება.