აფხაზეთის ავტონომიური რესპუბლიკის უმაღლესი საბჭოს წარმომადგენლობა საქართველოს პრეზიდენტის მიხეილ სააკაშვილის მიერ ტელეეთერით გაკეთებული განცხადებით გაკვირვებულია.
როგორც უმაღლესი საბჭოს სააკაშვილისადმი მიმართულ ღია წერილშია აღნიშნული, ტელეკომპანია "იმედის" ეთერში სააკაშვილმა განაცხადა, რომ რიყეზე არსებულ რესტორნებს შორის ერთ-ერთი, მაშინდელი აფხაზეთის "ეგრეთ წოდებულ" ავტონომიური რესპუბლიკის მთავრობას ეკუთვნოდა, რაც სინამდვილეს არ შეესაბამება.
"სრული პასუხისმგებლობით ვაცხადებთ, რომ არც მაშინდელ და არც ახლანდელ აფხაზეთის არ ლეგიტიმურ სტრუქტურებს არასოდეს ჰქონიათ რიყეზე არავითარი რესტორანი. ერთადერთი, რაც ჩვენ რიყესთან გვაკავშირებდა, თბილისის მერიის მიერ მონიშნული ტერიტორია იყო, სადაც "თბილისობის" დღეებში ჩვენ ფხაზეთის კუთხეს წარმოვადგენდით", - აღნიშნულია ღია წერილში.
უმაღლესი საბჭოს წარმომადგენლების განცხადებით, აღნიშნულ ტერიტორიაზე აფხაზური ფაცხა მუშაობდა, სადაც დევნილები იყვნენ დასაქმებულნი.
"ვის და რას დავაბრალოთ თქვენს მიერ აფხაზეთის მთავრობის "ეგრეთ წოდებულად" მოხსენიება? სამწუხაროა, მაგრამ ამ გამონათქვამს, ნებსით თუ უნებლიედ, აფხაზეთის საზოგადოება ჩვენი ქვეყნისთვის ერთ-ერთი უმნიშვნელოვანესი და უმტკივნეულესი აფხაზეთის პრობლემისადმი თქვენს დამოკიდებულებას უკავშირებს", - აცხადებენ საბჭოს წარმომადგენლები.
ისინი იმედოვნებენ, რომ ეს ტექსტობრივი შეცდომა იყო, რასთან დაკავშირებითაც პრეზიდენტმა შესაბამისი განმარტება უნდა გააკეთოს.
აფხაზეთის ა/რ უმაღლესი საბჭოს წარმომადგენლების თქმით, იმას თუ რამდენად იმსახურებს ეპითეტ "ეგრეთ წოდებულს" აფხაზეთის დევნილი საზოგადოება და მისი დევნილი ხელისუფლება, სამართლიან საქართველოში დრო და ისტორია თავის ადგილს მიუჩენს.
