27 მარტს დაგეგმილია თურქეთის რესპუბლიკის საგარეო საქმეთა მინისტრის აჰმეთ დავუთოღლუს ოფიციალური ვიზიტი საქართველოში. ამის შესახებ ჟურნალისტებთან საგარეო საქმეთა მინისტრის მოადგილემ დავით ჯალაღანიანმა ორშაბათის ტრადიციულ პრიფინგზე განაცხადა
,,თურქ მინისტრს უმასპინძლებს საგარეო საქმეთა მინისტრი მაია ფანჯიკიძე. ვიზიტის ფარგლებში, იგეგმება აჰმეთ დავუთოღლუს შეხვედრა საქართველოს პრეზიდენტთან, პრემიერ-მინისტრთან და პარლამენტის თავმჯდომარესთან.
შეხვედრებისას განხილვის საგანი იქნება ორ ქვეყანას შორის თანამშრომლობის ფართო სპექტრი ყველა იმ სტრეტეგიული მიმართულებით, რომელიც ფაქტობრივად ასახავს ჩვენი ორმხრივი და მრავალმხრივი თანამშრომლობის ძალზედ ინტენსიურ და ნაყოფიერ შინაარსს", -განაცხადა დავით ჯალაღანიანმა და აღნიშნა, რომ 28 მარტს, თურქეთის რესპუბლიკის საგარეო საქმეთა მინისტრი გაემგზავრება ბათუმში, სადაც იგი მონაწილეობას მიიღებს საქართველო-აზერბაიჯანი-თურქეთის საგარეო საქმეთა მინისტრების სამმხრივ შეხვედრაში.
