პრემიერ-მინისტრ ბიძინა ივანიშვილის განცხადებით, სარეიტინგო კენჭისყრის ჩატარება პარლამენტის თავმჯდომარე დავით უსუფაშვილს თვითონ ურჩია.
როგორც მან დღევანდელი მთავრობის სხდომის დაწყების წინ აღნიშნა, საკონსტიტუციო ცვლილებების განხილვის დროს ის უსუფაშვილს ტელეფონი საშუალებით ესაუბრებოდა.
"მე რა თქმა უნდა ტელეფონზე ვიყავი და უსუფაშვილს ვესაუბრებოდი. შესვენებაზე მე ვურჩიე უსუფაშვილს, რომ იმ ახირებისთვის მხარი დაეჭირა, თუმცაღა ძალიან დარწმუნებული იყო და არ ჰქონდა სურვილი უსუფაშვილს, რამეთუ კარგად იგრძნობოდა, რომ ისედაც მივიღებდით იმ ხმების რაოდენობას, რაც საჭირო იყო საკონსტიტუციო ცვლილებებისთვის", - განაცხადა ივანიშვილმა.
მისი თქმით, მან რატომღაც ასე ამჯობინა, რადგან ეს მისი გუნდისთვის პრინციპულად არაფერს ცვლიდა.
ივანიშვილის განმარტებით, სარეიტინგო კენჭისყრის ჩატარება პრინციპულად მხოლოდ საპარლამენტო უმცირესოაბს წარმოედგინა.
"ლიდერი ყველაფერს აკეთებდა და იბრძოდა იმისათვის, რომ როგორმე მიეღწია ამ უცნაურობისთვის, რაც მაგალითად ჩემთვის აუხსნელია დღესაც, რად უნდოდათ და რისთვის უნდოდათ ამ ღია კარების მტვრევა. ღია კარებს ამტვრევენ. იგივე მოხდა გუშინაც პარლამენტში. მე დავრეკე და შევცვალე პოზიცია", - განაცხადა პრემიერმა.
მისივე თქმით, პოლიტიკურად უფრო კარგი იქნებოდა, რომ არ დაერეკა და პოზიცია არ შეეცვალა.
"პოლიტიკურად იქნებოდა უფრო კარგი რომ არ დამერეკა, შესაძლებელია, მაგრამ ადამიანურად ჯობდა რომ არ დაგვეშვა ჩვენ არავითარი გამონაკლისი შემთხვევა იმისა, რომ საკონსტიტუიციო ცვლილება ძალიან დაბალი ალბათობით, ჩავარდნილიყო. ვურჩიე უსუფაშვილს, რომ ჯობს დავთმოთ ამ ახირებაზე. შედეგად ჩვენ მივიღეთ ის, რაც გვინდოდა. უკმაყოფილების გრძობა, რომელიც დარჩა საზოგადოებას, დამრჩა მეც", - განაცხადა ბიძინა ივანიშვილმა.
მისივე თქმით, მისი დიდი სურვილი იყო, რომ უმცირესობის ნაბიჯი ისეთი ყოფილიყო, რომ საზოგადოებისგან კარგად ყოფილიყო აღქმული.
"შედეგად, ხმები მისცეს, მაგრამ რაღაც უმადურად გამოუვიდათ - მარილი ვერ მოაყარეს. არა მგონია, რომ ეს ყველაფერი საზოგადოებამ სიამოვნებით მიიღო", - აღნიშნა პრემიერმა.
საკონსტიტუციო ინიციატივა პრეზიდენტის მიერ მთავრობის დათხოვნასთან დაკავშირებულ საკითხზე გუშინ, პირველი მოსმენით გავიდა - 135 ხმა არც ერთის წინააღმდეგ.
კენჭისყრამდე საქართველოს პარლამენტის თავმჯდომარემ მიღო გადაწყვეტილება სარეიტინგო კენჭისყრის ჩატარების შესახებ. გამოკითხვაში საკონსტიტუციო ინიციატივას 93 დეპუტატმა დაუჭირა მხარი.
