დავამტკიცეთ, რომ არასოდეს დავნებდებით შანტაჟს და ზეწოლას. ამის შესახებ საქართველოს პრეზიდენტმა მიხეილ სააკაშვილმა პარლამენტში საკონსტიტუციო ცვლილებების პირველი მოსმენით მიღების შემდეგ განაცხადა.
"დღეს ჩვენ დავამტკიცეთ, რომ არასოდეს დავნებდებით შანტაჟს და ზეწოლას. ასევე დავამტკიცეთ, რომ ყოველთვის ვიქნებით მზად შეთანხმებისთვის, ჩვენი ხალხის, ჩვენი ერისა და ევროპული მომავლის საკეთილდღეოდ", - განაცხადა პრეზიდენტმა.
პრეზიდენტმა აღნიშნა, რომ მმართველი ძალა თავისი პროკურორებით, ახალი გამგებლებით, ახალი ფორმირებებით, "მათ შორის ქუჩის ხულიგნებით და სხვა ძალებით", თვეებისა და კვირეების განმავლობაში ცდილობდა ოპოზიციონერი პარლამენტარების დაშანტაჟებას.
"ზეწოლის ყველაზე უღირს მეთოდებს იყენებდნენ საკონსტიტუციო უმრავლესობის მოსაპოვებლად", - განაცხადა პრეზიდეტმა და დასძინა, -"შეთავაზება იყო ერთი და იგივე, მიეცით ცვლილებებს ხმა უმრავლესობასთან ერთად და თქვენი პრობლემები მოგვარდება. დღეს "ნაციონალურმა მოძრაობამ" დაამტკიცა, რომ ეს მეთოდები არ მუშაობს".
შეგახსნებთ, რომ საკონსტიტუციო ინიციატივა პრეზიდენტის მიერ მთავრობის დათხოვნასთან დაკავშირებულ საკითხზე პირველი მოსმენით გავიდა - 135 ხმა არც ერთის წინააღმდეგ.
კენჭისყრამდე საქართველოს პარლამენტის თავმჯდომარემ მიღო გადაწყვეტილება სარეიტინგო კენჭისყრის ჩატარების შესახებ. გამოკითხვაში საკონსტიტუციო ინიციატივას 93 დეპუტატმა დაუჭირა მხარი.
კემჭისყრის შედეგებს დეპუტატები აპლოდისმენტებით შეხვდნენ.
პარლამენტის თავმჯდომარემ კი ხალხს გადაწყვეტილების მიღება მიულოცა.
