საპარლამენტო უმცირესობის ლიდერის დავით ბაქრაძის განცხადებით, აღნიშნულ სიტუაციაში ყველა ცუდი ისაა, რომ საპარლამენტო უმცირესობა და უმრავლესობა ერთმანეთისკენ ნაბიჯს ვერ დგამს.
როგორც მან პარლამენტში საკონსტიტუციო ცვლილებების განხილვისას აღნიშნა, ღელვა და მნიშვნელობაც კონსტიტუციური ცვლილებების საკითხისადმი, გასაგებია.
მისი თქმით, ბოლო თვეების განმავლობაში საკითხმა ისეთი მნიშვნელობა შეიძინა, რომ დღეს პოლიტიკური ბრძოლის ერთ-ერთ მნიშვნელოვან და გადამწყვეტ მომენტად გადაიქცა.
"ამ საკითხის წარმოჩენა ისე, თითქოს ამ ცვლილებებზეა დამოკიდებული ქვეყნის ბედი და თითქოს ამით ფასდება რამდენად შეძლებს ან ვერ შეძლებს ხელისუფლება ხალხისთვის დახმარებას, ეს არასწორია. ამის მარტივი დასტური გახლავთ ის ცვლილებები, რომელიც 2013 წლის ოქტომბერში კარგავს ძალას. ის ფაქტი, რომ 2012 წელს ჩვენ მივიღეთ საკონსტიტუციო ცვლილებები, რომელშიც ეს მექანიზმი აღარ არის ჩაწერილი, ჩვენს დამოკიდებულებას უკვე განსაზღვრავს ამ საკითხის მიმართ", - განაცხადა ბაქრაძემ.
მისი თქმით, დავა იმაზე, რომ შინაარსის მიმართ რა დამოკიდებულება აქვს უმცირესობას, ზედმეტია.
ბაქრაძის განცხადებით, უმცირესობის და უმრავლესობის გამოსვლებში ნათლად ჩანს, რომ არანაირი პერსპექტივა იმისა, რომ ეს ცვლილებები აპრილში იქნება გამოყენებული, არ არსებობს.
"ამ კონკრეტულ შემთხვევაში, მე ნამდვილად არ მომერიდება აბსოლუტურად ღიად, საჯაროდ და მკვეთრად დავაფიქსირო ჩემი პოზიცია. მიმაჩნია, რომ თუ პოლიტიკური კრიზისის შემთხვევაში, ამ მექანიზმის გამოყენებით პრეზიდენტი მოახდენს მთავრობის დათხოვნას და ფორმირებას პარლამენტის გარეშე, მე ჩემს ადგილს მის პოლიტიკურ გუნდში ვერ დავინახავ. ამას ვამბობ მკვეთრად, ღიად და საჯაროდ", - აღნიშნა უმცირესობის ლიდერმა და დასძინა, რომ ასეთი ცვლილების და მექანიზმის გამოყენებას გამორიცხავს.
მისივე თქმით, თუ უმრავლესობას სურს, რომ ამ პრინციპულ საკითხში ერთი და იგივე პოზიცია დაიკაონ, მაშინ ერთმანეთს პატივი უნდა სცენ.
"როდესაც ორი თვის განმავლობაში ისმენ, რომ თქვენს ხმას არა აქვს მნიშვნელობა და თქვენს გარეშეც გატანილი იქნება, ასე ადამიანები პარლამენტში ხმას არ აძლევენ. ეს ის შემთხვევაა, როდესაც ფორმა ძალიან მნიშვნელოვანია. ჩავარდნაც არ არის კარგი, არც თქვენთვის არც ჩვენთვის, არც ქვეყნისთვის. ამიტომ, რატომ გახდა მნიშვნელოვანი სარეიტინგო კენჭისყრა? რატომ აქვს ამ კენჭისყრას ამხელა პრინციპული მნიშვნელობა, რომ ამისთვის ეჭვის ქვეშ აყენებთ ოპოზიციასთან თანამშრომლობას?" - მიმართა დავით ბაქრაძემ საპარლამენტი უმრავლესობას.
მისივე თქმით, სარეიტინგო კენჭისყრა იმაზე მნიშვნელოვანი არაა, ვიდრე ქვეყნის დაწყნარება და სტაბილურობა.
"მხოლოდ თქვენი ხმებით ქვეყანა ვერ დაწყნარდება თუ არ ვითანამშრომლეთ. ყველაზე ცუდი ისაა, რომ ჩვენ ერთმანეთისკენ ნაბიჯის გადადგმა არ შეგვიძლია. ერთი პატარა ნაბიჯია ჩვენს შორის, რომელსაც ერთმანეთისკენ ვერ ვდგამთ", - განაცხადა ბაქრაძემ და უმრავლესობას კიდევ ერთხელ მიმართა, რომ ეს ნაბიჯი გადადგან და ცვლილებები ერთად მიიღონ.
საქართველოს პარლამენტი საკონსტიტუციო ცვლილებებს პირველი მოსმენით განიხილავს.
