კონსტიტუციონალისტ ავთანდილ დემეტრაშვილს საკონსტიტუციო ცვლილებებთან დაკავშირებით სერიოზული შენიშვნა არ აქვს. როგორც მან პრემიერ-მინისტრ ბიძინა ივანიშვილისა და ექსტპერტების შეხვედრის დაწყების წინ განაცხადა, შეხვედრაზე ისეთ სერიოზულ საკითხს განიხილავენ, რომელიც კონსტიტუციის მე-80 მუხლის I ნაწილს ეხება.
მისი თქმით, აღნიშნული მუხლის მიხედვით, პრეზიდენტს პარლამენტის ან მთავრობის დათხოვნის და შემდეგ ახალი მთავრობის ჩამოყალიბების უფლება აღარ ექნება.
"ეს სერიოზული და გამართლებული ცვლილება იქნება, რაც აღმასრულებელ და საპარლამენტო ხელისუფლებას შორის დაძაბულობას მოხსნის. გარდა ამისა, კონსტიტუციაში კიდევ არის რაღაცეები შესაცვლელი", - განაცხადა დემეტრაშვილმა.
მისივე თქმით, მე-80 მუხლის I პუნქტი სწორედ ისეა ჩამოყალიბებული, როგორსაც ახლა ამ ცვლილების ინიციატორები ითხოვენ.
რაც შეეხება კრიტიკას, დემეტრაშვილის განცხადებით, მას ბოლო დროის განმავლობაში, კონსტიტუციის ახალი რედაქციის მიმართ სერიოზული კრიტიკა არ გაუგია.
"ძირითად კრიტიკას იმსახურებს და დამსახურებულადაც, ის ცვლილება, რომელიც 2004 წლის 6 თებერვლის კონსტიტუციური კანონითაა გათვალისწინებული. იმ ცვლილების შედეგად ურთიერთობებში პრეზიდენტსა და აღმასრულებელ ხელისუფლებას შორის ასეთი მძიმე სიტუაცია შეიქმნა ", - ავთანდილ განაცხადა დემეტრაშვილმა.
ბიძინა ივანიშვილი ამ წუთებში დამოუკიდებელ ექსპერტთა კლუბის წევრებს ხვდება. შეხვედრაზე საქართველოში საკონსტიტუციო რეფორმას განიხილავენ.
