არასამთავრობო სექტორმა ევროკავშირისა და გაეროს განვითარების ფონდის მხარდაჭერით წინასაარჩევნოდ მედია მონიტორინგის კვლევა ჩაატარა და შედეგების პრეზენტაცია ,,ქორთიარდ მარიოტში" დღეს გაიმარტა.
კვლევა, რომელიც ოთხმა არასამთავრობო ორგანიზაციამ კავკასიის კვლევითი რესურსების ცენტრმა, ინტერნიუს-საქართველომ, სამართლიანი არჩევნებისა და დემოკრატიის საერთაშორისო საზოგადოებამ და სამოქალაქო განვითარების ინსტიტუტმა 2012 წლის 11 მაისიდან 30 ნოემბრის ჩათვლით განახორციელა.
კვლევის ობიექტი ტელევიზიები, რადიოები, ბეჭდური და ონლაინ მედია იყო.
როგორც კვლევის ორგანიზატორებმა შეხვედრის დაწყებამდე განაცხადეს წინასაარჩევნო პერიოდში ტელევიზიებში მიკერძოებულობა დაფიქსირდა, ნაწილი მათგანი ,,ნაციონალურ მოძრაობას", ნაწილი კი კოალიცია ,,ქართულ ოცნებას" ემხრობოდა, რაც შეეხება რადიოებს აქ შედარებით დაბალანსებული სიტუაცია დაფიქსირდა, ბეჭდურ მედიას რაც შეეხება მკვლევარების აზრით, გაზეთები ,,ნაციონალური მოძრაობის" მიმართ კოალიცია ,,ქართულ ოცნებასთან" შედარებით უფრო კრიტიკულები იყვნენ. როგორც კვლევის ორგანიზატორები აცხადებენ ონლაინ მედიაში წინასაარჩევნოდ პროცესები ცალმხრივად შუქდებოდა.
,,წინასაარჩევნოდ ონლაინ მედიაში ყველაზე მნიშვნელოვანი ხარვეზი მოვლენების ცალმხრივად გაშუქება იყო. დაფიქსირდა დისკრიმინაციული და ზოგ შემთხვევაში შეურაცხმყოფელი ტერმინოლოგია. სამწუხაროა, რომ დისკრიმინაცია და შეურაცხმყოფელი ტერმინოლოგია ხშირ შემთხვევაში ჟურნალისგან მოდიოდა. ,,დრონი.გე" და ,,პრესა.გე" სისტემატიურად არღვევდნენ ეთიკის ნორმებს", _განაცხადა ,,ჯი-ეიჩ-ენთან" საუბარაში სამოქალაქო ინსტიტუტის წარმომადგენელმა გიორგი ჯოლოგუამ, რომელმაც კვლევა ონლაინ მედიაზე ჩაატარა.
კვლევის ორგანიზატორების განცხადებით, ანალოგიური კვლევა საპრეზიდენტო არჩევნების წინ, დაახლოებით მაისის თვიდან ჩატარდება.