ჟენევის დისკუსიებში მონაწილე საქართველოს დელეგაციას მარტიდან ახალი შემადგენლობა ეყოლება.საგარეო საქმეთა მინისტრის მაია ფანჯიკიძის განმარტებით, მარტში დაგეგმილ ჟენევის დისკუსიებში საქართველო მონაწილეობას განახლებული შემადგენლობით მიიღებს. დელეგაციის ახალი წევრების ვინაობა მინისტრს არ დაუკონკრეტებია.
მისივე თქმით, ჟენევის მოლაპარაკებების ფორმატი იმ სახით, როგორითაც დღეს მოქმედებს, შეუცვლელია და ამასთან დაკავშირებით ორი აზრი არ არსებობს.
"ჟენევის ფორმატი არანაირ ცვლილებებს არ ექვემდებარება. ამ ფორმატში რუსეთთან საერთაშორისო ორგანიზაციების მონაწილეობით პირდაპირი საუბარი ხორციელდება და მოლაპარაკებების ეს ფორმატი შენარჩუნდება ყველა გზით, რაც კი არსებობს. ახლა ჩვენი ერთადერთი მიზანია, რომ რაკი მოლაპარაკებების ამ ფორმატს ჯერ არანაირი რეალურ შედეგი არ მოუტანია, შედეგი მოიტანოს. არსებობს კონკრეტული ახალი იდეები, რომელიც ფორმატის მონაწილეებისთვის შეიძლება საინტერესო აღმოჩნდეს. მაგალითად, ჰუმანიტარული საკითხები. პარალელურად, საქართველოს ხელისუფლება ცდილობს, აფხაზებთან და ოსებთან პირდაპირი დიალოგი გააღრმავოს", - განაცხადა მაია ფანჯიკიძემ.
