უნდა ვთქვა, რომ ზოგიერთი ინფორმაცია დამშვიდების საშუალებას არ გვაძლევს, - ამის შესახებ განაცხადა ჟურნალ "ლიბერალისთვის" მიცემულ ინტერვიუში ევროკავშირის გაფართოებისა და ევროპის სამეზობლო პოლიტიკის საკითხებში ევროკომისრმა შტეფან ფულმ.
მისი თქმით, ევროკავშირთან დაახლოება მხოლოდ ასოცირებისა და თავისუფალი ვაჭრობის შეთანხმებებზე თანამიმდევრულ მუშაობაზე არაა დამოკიდებული და მხოლოდ შეთანხმებებსა და საჯარო განცხადებებს არ გულისხმობს. პარტნიორობა ძირეულ ფასეულობებს, სამართლებრივი სახელმწიფოს პრინციპებს და ფუნდამენტურ თავისუფლებებსაც ეხება.
"ეს ძალიან მნიშვნელოვანი ელემენტებია. უნდა ვთქვა, რომ ზოგიერთი ინფორმაცია დამშვიდების საშუალებას არ გვაძლევს. შესაძლოა, ეს კოჰაბიტაციის პირდაპირი ან ირიბი ეფექტი იყოს. მონაწილეები თავად უნდა შეთანხმდნენ ამ საკითხებზე. ევროპული ინსტიტუტები და ევროკომისია ასეთ თემებზე მომლაპარაკებელი და მსაჯული ვერ იქნება. თუმცა, არც იმას ვამბობ, რომ ჩვენ პასიური დამკვირვებლები ვართ. საქართველომ საკუთარი სწრაფვა ევროპული პერსპექტივისკენ ერთმნიშვნელოვნად დაადასტურა", - აცხადებს ფულე და აღნიშნავს, რომ მისი და ქეთრინ ეშტონის ერთობლივი განცხადების გზავნილიც პრეზიდენტისა და პრემიერ-მინისტრისათვის ერთმნიშვნელოვანი იყო: მათ უნდა მოიძიონ ერთმანეთთან კომუნიკაციის გზები და უნდა შეთანხმდნენ შეცდომების გამოსწორებაზე.
"უნდა დაამტკიცონ, რომ კოჰაბიტაცია ევროკავშირთან დაახლოვების პროცესში შემაფერხებელი არ იქნება. ორივემ ერთი როლი უნდა შეასრულოს. ძირეული ბაზისი უნდა შექმნან კოჰაბიტაციითვის, რაც თავისთავად რთული მდგომარეობაა და დასავლეთევროპული დემოკრატიებისთვისაც კი არ იქნებოდა მარტივი. ეს, რა თქმა უნდა, დიდი გამოწვევაა ქვეყნისთვის, რომელმაც ისტორიაში პირველად შეძლო ხელისუფლების თავისუფალი და მშვიდობიანი არჩევნების შედეგად შეცვლა. მაგრამ მნიშვნელოვანია, და ეს ორივე მხარე მოეთხოვება, ქვეყნის ინტერესები საკუთარ პირად ან პარტიულ ინტერესებზე მაღლა დააყენონ", - აცხადებს შტეფან ფულე.
მასალის გამოყენების პირობები
