პრეზიდენტ მიხეილ სააკაშვილის ვარაუდით, მაქსიმუმ 5-6 წელიწადში საქართველოდან ემიგრაციის ეკონომიკური მიზეზი აღარ იარსებებს.
"მაქსიმუმ 5-6 წელიწადში (იმედია ამას 3-4 წელიწადშიც მივაღწევთ), საქართველოდან ემიგრაციის ეკონომიკური მიზეზი და საბაბი აღარ იარსებებს. მართალია, ახლაც უფრო მეტი ქართველი ბრუნდება უცხოეთიდან, ვიდრე მიდის, მაგრამ ემიგრაციის პროცესი მაინც გრძელდება. ამ ვადაში კი, ვფიქრობთ, ქართველების სამშობლოში საბოლოოდ დაბრუნებისთვის ყველა საფუძველი უნდა არსებობდეს", - ამის შესახებ მიხეილ სააკაშვილმა ვანკუვერში, ქართული დიაპორის წარმომადგენლებთან შეხვედრაზე განაცხადა.
ამასთან, ქართველ ემიგრანტებთან შეხვედრისას, ქვეყნის პირველმა პირმა მათ ქართული ენის დისტანციური სწავლების მეთოდის დანერგვის ინიციატივაც გააცნო, რათა "ემიგრანტმა ბავშვებმა მშობლიური ენა არ დაივიწყონ".
"ჩვენ ჩამოვიტანთ წიგნებს და ყველაფერს, რაც საჭიროა იმისთვის, რომ უცხოეთში მცხოვრებმა ბავშვებმა მშობიური ენა არ დაივიწყონ. დავნერგავთ ქართული ენის დისტანციური სწავლების მეთოდსაც", - განმარტა ქვეყნის პირველმა პირმა.
აღნიშნულის გარდა, საქართველოს პრეზიდენტმა ქართველ ემიგრანტ ბავშვებს იმის პირობაც მისცა, რომ საქართველოში პროგრამა "პატრიოტის" ფარგლებში ჩამოიყვანს. ქვეყნის პირველი პირი მათ დასვენებას შაურისა და ანაკლიის ბანაკებში დაჰპირდა.
შეგახსენებთ, რომ მიხეილ სააკაშვილი უკვე რამდენიმე დღეა არაოფიციალური ვიზიტით კანადაში იმყოფება.
