საპარლამენტო უცმირესობის წევრი დავით დარჩიაშვილი აცხადებს, რომ "საერთო სასამართლოების შესახებ" კანონპროექტის მიღებით, ხელისუფლებას სურს მოსამართლეთა შემადგენლობის შეცვლა. მისი თქმით, ამ საკითხზე ვენეციის კომისიმ მოითხოვა განხილვების გადადება.
"ამ ახალი კანონთ უნდათ მოსამართლეთა შემადგენლობისა და მათი ფუნქციების შეცვლა და ასევე, პარლამენტისათვის მოსამართლეთა დანიშვნის ფუნქციების გადაცემა. ეს არის პრობლემის შემქნელი. ამაზე ვენეციის კომისიამ გამოხატა შეშფოთება და მოითხოვა განხილვების გადადება. ეს ის კომისიაა, რომელზე აპელირებას მაშინდელი ოპოზიცია და არასამთავრობო სექტორი ყოველთვის ახდენდა. თუ ეს ყველაფერი იქნება იგნორირებული, პრეზიდენტს აქვს უფლება დაადოს ვეტო", - განაცხადა დარჩიაშვილმა.
შეგახსენებთ, რომ საქართველოს პრეზიდენტმა მიხეილ სააკაშვილმა გუშინ გამართულ საგანგებო ბრიფინგზე განაცხადა, რომ "საერთო სასამართლოების შესახებ" კანონპროექტს ვეტოს დაადებს თუ იმ ფორმით დამტკიცდება, რა ფორმითაც ახლაა. მისი თქმით, კანონოპროექტის მირების შემთხვევაში სასამართლო ინსტიტუტი მთლიანად აღმოჩნდება დამოუკიდებლობის გარეშე.
"იუსტიციის საბჭო და სასამართლო ხელისუფლება მთლიანად მოექცევა აღმასრულებელი ხელისუფლების კონტროლის ქვეშ, უკვე ფორმალურადაც. საუბარია იმაზე, რომ რომც მოინდომონ მოსამართლეებმა წინააღმდეგობის გაწევა პროკურატურისადმი, პრემიერ-მინისტრისადმი, იუსტიციის სამინისტროსადმი, ამის ფორმალური საშუალებაც აღარ ექნებათ", - განაცხადა პრეზიდენტმა.
პარლამენტმა, პირველი მოსმენით - პრინციპების დონეზე, სასამართლოებთან დაკავშირებით იუსტიციის სამინისტროს მიერ შეთავაზებული საკანონმდებლო პაკეტი დაამტკიცა. ცვლილებები "საერთო სასამართლოების შესახებ", "საერთო სასამართლოების მოსამართლეთა დისციპლინარული სამართალწარმოების შესახებ", "იუსტიციის უმაღლესი საბჭოს შესახებ" კანონებში და "სისხლის სამართლის საპროცესო კოდექსში" აისახება.