ნავთობპროდუქტების იმპორტიორთა კავშირის თავმჯდომარის ვანო მთვრალაშვილის განმარტებით, მიმდინარე წლის პირველი რვა თვის განმავლობაში საქართველოში იმპორტირებულ ბენზინში ყველაზე დიდი წილი უკავია რეგულარი A-92 ტიპის საწვავს - 158 689 970 კგ ,ანუ 72.3 პროცენტი, პრემიუმის ტიპის A -95 ტიპის საწვავს - 54 471 871 კგ, ანუ 24.8 პროცენტი და სუპერი ტიპის A -98 ტიპის საწვავს - 6 241 089 კგ, ანუ 2.8 პროცენტი.
"წინა წლებისგან განსხვავებით შემცირებულია A-92 რეგულარის ტიპის ბენზინის იმპორტი, რომელსაც ადრე 80 პროცენტიანი წილი ეკავა. ამის ხარჯზე გაზრდილია პრემიუმი და სუპერი ტიპის ბენზინის იმპორტი და მოხმარება.
რეგულარის საწვავის დიდი ხვედრითი წილი განპირობებულია იმით, რომ მისი ფასი გაცილებით დაბალია (საშუალოდ 10-15 თეთრით ლიტრაზე) პრემიუმი და სუპერის ტიპის ბენზინთან შედარებით და ასევე მიუხედავად მუდმივი განახლებისა, საქართველოს ავტოპარკი მაინც ძველია და აქ მოძრავი მანქანებისთვის რეგულარის ტიპის საწვავის მოხმარება აბსოლუტურად მისაღებია"- აცხადებს ვანო მთვრალაშვილი.
ნავთობპროდუქტების იმპორტიორთა კავშირის თავმჯდომარე განმარტავს, რომ დღეს საქართველოში იმპორტირებული ბენზინის თითქმის 60 პროცენტი არის ევრო 4 და ევრო 5-ის სტანდარტის შესაბამისი ბენზინი.
"აღნიშნული კატეგორიის საწვავი იმპორტირებულია ევროპული ქვეყნებიდან: საბერძნეთი, იტალია, ბულგარეთი, რუმინეთი. პრემიუმი და სუპერის ტიპის ბენზინის იმპორტი მხოლოდ და მხოლოდ ევროპიდან ხორციელდება. ევროპული ქვეყნებიდან ხდება ასევე რეგულარის ტიპის საწვავის იმპორტი, რომელიც საცალო ქსელში ევრო რეგულარის სახით იყიდება. რაც შეეხება დარჩენილ რეალიზებული ბენზინის 40 პროცენტს, ესაა ევრო 1 და ევრო 2 სტანდარტის შესაბამისი ბენზინი, რომლის იმპორტი ხორციელდება აზერბაიჯანის რესპუბლიკიდან და აქვე უნდა აღვნიშნოთ, რომ თავისი ფიზიკურ-ქიმიური მაჩვენებლებით მნიშვნელოვნადაა გაუმჯობესებული ბოლო წლების განმავლობაში"- განმარტავს მთვრალაშვილი.
რაც შეეხება დიზელის საწვავს, იმპორტირებულ დიზელის საწვავში ყველაზე დიდი წილი უკავია L-62-ს - 174 175 791 კგ ანუ 70.9 პროცენტი, ხოლო დარჩენილი წილი უკავია ევრო დიზელს - 71 421 228 კგ ანუ 29 პროცენტი.
