ავღანეთი აშშ-ის პრეზიდენტ დონალდ ტრამპს ბაგრამის ავიაბაზას აშშ-ს არ დაუბრუნებს. ამის შესახებ ავღანეთის „თალიბანის“ მთავრობის ოფიციალურ განცხადებაშია ნათქვამი, რომელიც სოციალურ ქსელ X-ზე რადიკალური ისლამისტური მოძრაობის წარმომადგენელმა ზაბიჰულა მუჯაჰიდმა გამოაქვეყნა.
„უნდა გავიხსენოთ, რომ დოჰას შეთანხმების (ავღანეთში მშვიდობის აღდგენის შესახებ შეთანხმება, რომელიც შეერთებულ შტატებსა და თალიბანს შორის 2020 წელს დაიდო) შესაბამისად, შეერთებულმა შტატებმა აიღო ვალდებულება „არ გამოიყენოს ან არ დაემუქროს ძალის გამოყენებით ავღანეთის ტერიტორიულ მთლიანობას ან პოლიტიკურ დამოუკიდებლობას, ან არ ჩაერიოს მის შიდა საქმეებში“, - ნათქვამია განცახდებაში.
ამავდროულად, ქაბულმა აღნიშნა, რომ ის ისწრაფვის „ყველა სახელმწიფოსთან კონსტრუქციული ურთიერთობებისკენ, რომლებიც დაფუძნებული იქნება ორმხრივ და საერთო ინტერესებზე“.
ვაშინგტონმა, „წარსულის წარუმატებელი მიდგომების გამეორების ნაცვლად, რეალიზმისა და რაციონალურობის პოლიტიკა უნდა გაატაროს“, - აღნიშნულია განცხადებში.
ამასთან, „თალიბანის“ მიერ დანიშნულმა ავღანეთის არმიის შტაბის უფროსმა, ქარი ფასიჰუდინმა, ასევე განაცხადა, რომ ქვეყანა თავისი მიწის „ერთ დიუმსაც“ არავის დაუთმობს.
შეგახსენებთ, დონალდ ტრამპმა განაცხადა,რომ "ავღანეთი თუ ბაგრამის ავიაბაზას ამერიკას არ დაუბრუნებს, ცუდი რამ მოხდება".
