როგორც ოკუპირებულ აფხაზეთში გუშინ ჩატარებულ არჩევნებზე კომენტირებისას იაკობაშვილმა ჟურნალისტებს განუცხადა, არჩევნები უკანონოა, რომელსაც საერთაშორისო საზოგადოება არ სცნობს.

"ეს იყო სრული ფარსი და ამ არჩევნებს არანაირი იურიდიული ძალა არ შეიძლება ჰქონდეს. თუნდაც იმიტომ, რომ მასში მონაწილეობა არ მიუღია გალის მოსახლეობას, რომელმაც აფხაზურ პასპორტებზე უარი თქვეს. ამიტომაც, არ ვაპირებთ მას ზედმეტი ყურადღება მივანიჭოთ, თუმცა ამავე დროს ჩვენთვის სულერთი არაა რა ხდება აფხაზეთის ტერიტორიაზე", - განაცხადა იაკობაშვილმა.

შეგახსენებთ, რომ სეპარატისტულ აფხაზეთში ე. წ. საპრეზიდენტო არჩევნები გუშინ, 12 დეკემბერს გაიმართა. საარჩევნო უბნები მოსკოვის დროით 08:00 საათზე გაიხსნა და 20:00 საათზე დაიხურა. აფხაზური ე. წ. კანონმდებლობის თანახმად, არჩეულად ითვლება კანდიდატი, რომელიც ამომრჩეველთა ხმების ნახევარს დააგროვებს.

სეპარატისტების ე. წ. ცესკოს მიერ შედგენილ სიაში 131 000 ამომრჩეველი იყო. სულ აფხაზეთში 35 საარჩევნო ოლქი და 174 უბანი მომქდებდა. საარჩევნო უბნები ასევე გახსნილი იყო მოსკოვსა და ჩერკესკში. ე. წ. აფხაზური ცესკოს თავმჯდომარის ბათალ ტაბაღუას ინფორმაციით, არჩევნებს მხოლოდ რუსეთიდან 80 დამკვირვებელი ესწრებოდა. მისი თქმით, დამკვირვებლები ასევე იყვნენ დსთ-ის ქვეყნებიდან, ევროპასა და აშშ-დან.