ტოტალის მმართველმა დირექტორმა ჟან მიშელ ჰიერონიმუსმა კომპანიის სხვა წარმომადგენლებთან ერთად თბილისში, პოლიტკოვსკაიას ქ.#2°-ში მდებარე ვისოლის ავტოგასამართ სადგურზე "ვისოლ ავტო ექსპრესის" კიდევ ერთი ობიექტი გახსა.
ფრანგული ტოტალის წარმომადგენლები საქართველოში ვისოლთან, როგორც ექსკლუზიურ პარტნიორთან თანამშრომლობას ეფექტურად მიიჩნევენ და "ვისოლ ავტო ექსპრესის" ქსელში უმაღლესი ხარისხის ტოტალის ფრანგული საავტომობილო ზეთებისა და სხვა საპოხი მასალის გაყიდვებს დადებითად აფასებენ.
"ორ წელიწადს ვსწავლობდით საქართველოს საინვესტიციო კლიმატს და დავრწმუნდით, რომ ვისოლი იყო ის ბრენდი, რომლის სახელთანაც ტოტალის ასოცირება ქვეყნის ბაზარზე დამკვიდრების წარმატებული გზა იქნებოდა. "ვისოლ ავტო ექსპრესის" ქსელში ჩვენი პროდუქტების გაყიდვების მაჩვენებელი კი კიდევ უფრო მეტად გვარწმუნებს ჩვენი გადაწყვეტილების სისწორეში. დღესდღეობით ტოტალის პროდუქტების რეალიზაცია "ვისოლ ავტო ექსპრესის" მომსახურების სამ ცენტრში ხდება. უახლოეს მომავალში საქართველოს ყველა დიდ ქალაქში განვავითარებთ ქსელს", - განაცხადა ჰიერონიმუსმა.
ვისოლმა მსოფლიოში სიდიდით მე-4 ნავთობკომპანიასთან ტოტალთან გრძელვადიანი ხელშეკრულება ხანგრძლივი მოლაპარაკებების შედეგად გააფორმა და ტოტალის საავტომობილო ზეთებისა და საპოხი მასალების ექსკლუზიური იმპორტიორი გახდა საქართველოში.
"ტოტალის საქართველოში შემოსვლა მნიშვნელოვანი ნაბიჯი იყო ჩვენი ქვეყნის ეკონომიკის შემდგომი განვითარების გზაზე. ის, რომ მოთხოვნა ევროპული სტანდარტების საავტომობილო ზეთებსა და საპოხ მასალებზე დღითიდღე იზრდება, ჩვენს ფრანგ პარტნიორებს სტიმულს აძლევს უფრო მეტი ინვესტიცია განახორციელონ და მეტად განავითარონ ბიზნესი ადგილობრივ ბაზარზე", - აცხადებს ვისოლის სამეთვალყურეო საბჭოს თავმჯდომარე სოსო ფხაკაძე.
"ვისოლ ავტო ექსპრესი" 2011 წლიდან დამკვიდრდა საქართველოს ბაზარზე და ერთადერთ ავტომომსახურების ცენტრების ქსელს წარმოადგენს მთელი ქვეყნის მასშტაბით. კომპანიის ავტომომსახურების ცენტრები უმაღლესი ხარისხის ტოტალის ფრანგული საავტომობილო ზეთების და სხვა საპოხი მასალების გარდა მომხმარებელს ავტომობილების გაზზე გადაყვანის სერვისს, საბურავებს და ვულკანიზაციისა და ბალანსირების სრულ მომსახურებისაც სთავაზობს.