უახლოეს დღეებში შემოსავლების სამსახური თხილის, ბამბის და მინის მწარმოებლებისათვის საწარმოო დანაკარგებს განსაზღვრავს, ამის შესახებ განცხადება შემოსავლების სამსახურის უფროსმა ჯაბა ებანოიძემ გააკეთა. თუმცა მანამდე შემოსავლების სამსახურმა ალკოჰოლური სასმელის წარმოების/იმპორტისას, აგრეთვე სიგარა/სიგარეტისა და სიგარელებისთვის გამოყენებული აქციზური მარკების დაზიანების შემთხვევაში, დანაკარგების მოცულობა განსაზღვრა.
შემოსავლების სამსახურის ინფორმაციით, აქციზური მარკების დაზიანებისას დანაკარგების ოდენობა შემოსავლების სამსახურში შექმნილმა კომისიამ მეწარმეებისგან მიწოდებული ფაქტობრივი ინფორმაციისა და საერთაშორისო გამოცდილებაზე დაყრდნობით განსაზღვრა, კერძოდ, ალკოჰოლური სასმელის წარმოებისას/იმპორტისას აქციზური მარკების დაზიანებით გამოწვეული დანაკარგის ზღვრული ნორმა 2 %-ის ოდენობით, სიგარა/სიგარეტისთვის გამოყენებული აქციზური მარკების დაზიანებით გამოწვეული დანაკარგის ზღვრული ნორმა 1%-ით, ხოლო სიგარელებისთვის გამოყენებული აქციზური მარკევის დაზიანებით გამოწვეული დანაკარგის ზღვრული ნორმა 2%-ის ოდნეობით.
"დღეისათვის შემოსავლების სამსახურმა დაადგინა საწარმოო დანაკარგების ზღვრული ოდენობა ალკოჰოლური სასმელების მწარმოებელი, იმპორტიორი კომპანიებისათვის და ასევე სიგარეტის მწარმოებელი, იმპორტიორი კომპანიებისათვის. თუ დღემდე თითოეული დახეული აქციზის გამო კომპანიას ეთვლებოდა, რომ მან ალკოჰოლური სასმელების ან სიგარეტის რეალიზაცია მოახდინა და ის შესაბამისად საბაზრო ფასის შესაბამისად იბეგრებოდნენ, დღეიდან ეს შეზღუდვები იხსნება"- განაცხადა შემოსავლების სამსახურის უფროსმა ჯაბა ებანოიძემ.
შემოსავლების სამსახურში ფიქრობენ, რომ ეს გადაწყვეტილება დიდი შეღავათია მეწარმეებისთვის, რადგან მათ აქციზური მარკების დაზიანებით გამოწვეული დანაკარგი აღარ ჩაეთვლებათ დანაკლისად და აღარ დაექვემდებარება დაბეგვრას. მნიშვნელოვანია ისიც, რომ სურვილის შემთხვევაში მეწარმეებს შეეძლებათ მიმართონ შემოსავლების სამსახურს და მომსახურების საფასურის გადახდის შემდეგ შემოსავლების სამსახური დაადგენს მათ საწარმოო დანაკარგს, რომელიც შემდგომში სავალდებულო წესი იქნება გათვალისწინებული გადასახადების ადმინისტრირების, მათ შორის შემოწმების პროცესში.
თავად ბიზნეს წრეებში მიიჩნევენ, რომ მთავრობის ახალი ინიციატივა კარგია და რომ ეს კერძო სექტორს ბევრ პრობლემას მოუგვარებს.
ალკოჰოლური სასმელების მწარმოებელი კომპანია "თელიანი ველის" მენეჯმენტის განცხადებით, მათ წინაშე ანალოგიური პრობლემები იდგა.
"ჩვენი კომპანია აწარმოებს აქციზურ პროდუქციას და ეწევა აქციზური პროდუქციის იმპორტს, შესაბამისად საწარმოო დანაკარგებთან დაკავშირებით პრობლემები გვქონდა. კომპანიაში გვქონია ისეთი შემთხვევაც. როდესაც შემოვიდა პროდუქცია და ვაგონში იყო დანაკლისი და აქედან გამომდინარე პრობლემა შეგვექმნა, თუმც საბოლოოდ შემოსავლების სამსახურის დახმარებით მოვაგვარეთ", - განაცხადა "თელიანი ველის" ფინანსურმა დირექტორმა კობა ჭანტურიამ.
შპს "საქართველოს თამბაქოს წარმოების" ხელმძღვანელის ირაკლი ბოჭორიშვილი კი აცხადებს, რომ დღემდე მის კომპანიას მხოლოდ საწარმოო ნარჩენების თემა აწუხებდა, ხოლო წარმოების პროცესში აქციზის მხრივ დაზიანებები არ ყოფილა.
"ვფიქრობ, რომ საწარმოო დანაკარგების ზღვარის განსაზღვრა მნიშვნელოვანი გადაწყვეტილებაა, რადგანაც სიგარეტის წარმოებაში საწარმოო ნარჩენების თემა მეტად აქტუალურია. ამ საკითხთან დაკავშირებით, 2 კვირის წინ შემოსავლების სამსახურის უფროსთან გვქონდა შეხვედრა. რაც შეეხება აქციზურ მარკებს ჩვენი ნაწარმო ისეთ ტექნოლოგიითა აღჭურვილი, რომ აქციზურ დანაკარგებს არ ვუჩიოდით"- განაცხადა შპს "საქართველოს თამბაქოს წარმოების" გენერალურმა დირექტორმა ირაკლი ბოჭორიშვილმა.
შეგახსენებთ, რომ შემოსავლების სამსახურის ინიციატივის მიხედვით, საწარმოო დანაკარგები გასულ კვირას დადგინდა მეტალურგიის სფეროსთვის. საწარმოო დანაკარგების საკითხი სხვა სფეროებშიც განისაზღვრება და ეს პროცესი ეტაპობრივად განხორციელდება.
