ბათუმის საკრებულომ 2010 წლის ბიუჯეტის შესრულების ანგარიში დაამტკიცა. საკრებულოს რიგგარეშე სხდომაზე დეპუტატებს ანგარიში ქალაქის მერმა გააცნო.
2010 წლის ქალაქის ბიუჯეტი, რომელიც 99,5 %-ით შესრულდა, ძირითადად, სანიაღვრე არხების რეაბილიტაციის პროგრამის განხორციელებას, ისტორიული უბნებისა და ტურისტული ინფრასტრუქტურის რეაბილიტაციას, ასევე სოციალური და ჯანდაცვის პროგრამების შესრულებას მოხმარდა.
სხდომაზე 2010 წლის მუნიციპალური პროგრამების შესრულების ანგარიშიც დაამტკიცეს, რომელიც მერიის შესაბამისი სამსახურების ხელმძღვანელებმა წარმოადგინეს.
გარდა ამისა, საკრებულოს გადაწყვეტილებით, მალე ბათუმში (ბარათაშვილის ქ. N-14 -ში) პოეტის, დრამატურგისა და საზოგადო მოღვაწის, ფრიდონ ხალვაშის მემორიალური დაფა განთავსდება.
დღეს გამართულ რიგგარეშე სხდომაზე დეპუტატებმა სულ 20 საკითხი განიხილეს.
