"ბიზნეს სოფტვეარ ალიანსი" საქართველოში ინტელექტუალური საკუთრების დაცვის გაძლიერებისა და კომპიუტერულ პროგრამებზე საავტორო უფლებების დარღვევის ხვედრითი წილის შემცირების მიზნით, აქტიურდება.
ამ მიზნით, 28 აპრილს, 12:00 საათზე, "ბიზნეს სოფტვეარ ალიანი" ("ბი.ეს.ეი.") სასტუმრო "რადისონში" ოფიციალურ განცხადებას გააკეთებს.
კომპანიის ინფორმაციით, კომპიუტერული პროგრამების არაავტორიზებული ასლების გადაღება, რეპროდუქცია, დისტრიბუცია და გამოყენება კვლავინდებურად ერთ-ერთი ყველაზე დიდი საფრთხეა თანამედროვე ინფორმაციულ-ტექნოლოგიური ინდუსტრიისთვის."გლობალური ბაზრის კვლევის ორგანიზაციის" მიერ ჩატარებული კვლევების შედეგებში ჩამოთვლილია ის ეკონომიკური სარგებელი, რაც პროგრამული უზრუნველყოფის მეკობრეობის დონის შემცირებას ახლავს. 2008 წელს ჩატარებული კვლევის თანახმად, პროგრამული უზრუნველყოფის მეკობრეობის 10%-ით შემცირება გამოიწვევს 600 000 ახალი სამუშაო ადგილის შექმნას მსოფლიო მასშტაბით და სახელმწიფო შემოსავლების 24 მილიარდი დოლარით ზრდას, გადასახადების მომატების გარეშე. ამ ტიპის რეფორმების გატარებით გამოწვეული სარგებლის უდიდესი წილი - საშუალოდ 80% მოდის ადგილობრივ ეკონომიკაზე.
კომპანიაში განმარტავენ, რომ საქართველომ უკვე განაცხადა ამ პრობლემის შესახებ. მნიშვნელოვანია ინტელექტუალური საკუთრების უფლების დაცვის გაძლიერება და კომპიუტერულ პროგრამებზე საავტორო უფლებების დარღვევის ხვედრითი წილის შემცირება. დღემდე გაწეული ძალისხმევის მიუხედავად, "აი.დი.სის" 2009 წლის კვლევის მონაცემებით, პროგრამული უზრუნველყოფის მეკობრეობის დონე საქართველოში მსოფლიოში ყველაზე მაღალი, 95% რჩება. აღსანიშნავია, რომ ბევრი საერთშორისოდ აღიარებული პროგრამული უზრუნველყოფის კომპანია თავს იკავებს ქართულ ბაზარზე შემოსვლისგან, რათა თავი აარიდოს იმ შესაძლო პრობლემებს, რასაც მეკობრეობა გამოიწვევს.
პროგრამული უზრუნველყოფის მეკობრეობის შემცირება საქართველოს მთავრობისთვის პრიორიტეტი უნდა იყოს და "ბი.ეს.ეი" მზადაა, მხარი დაუჭიროს ამ წამოწყებას ქვეყნის ეკონომიკური ზრდისა და განვითარებისთვის.
"ბიზნეს სოფტვეარ ალიანსი" პროგრამული უზრუნველყოფის ინდუსტრიის მოწინავე დამცველია მთელ მსოფლიოში. კომპანია მუშაობს 80 ქვეყანაში რათა გააფართოოს პროგრამული უზრუნველყოფის ბაზრები და შექმნას გარემო ზრდისა და ინოვაციისთვის.
მთავრობები და პარტნიორი მეწარმეები სარგებლობენ "ბი.ეს.ეის" გამოცდილებით არსებით მიმართულებებსა და სამართლებრივ საკითხებთან დაკავშირებით პოზიციის ჩამოყალიბებისას, რადგან იზიარებენ აზრს, რომ პროგრამულ უზრუნველყოფას წამყვანი როლი უჭირავს ეკონომიკურ და სოციალურ პროგრესში მთელი მსოფლიოს მასშტაბით.
"ბი.ეს.ეის" წევრი კომპანიები მილიარდობით დოლარის ინვესტიციას დებენ ადგილობრივ ეკონომიკებში, ახალი სამუშაო ადგილების შექმნასა და პროგრესული გადაწყვეტილებების მოძიებაში, რათა მსოფლიო ხალხებს საშუალება მიეცეთ, უფრო ნაყოფიერად, ურთიერთშეთანხმებულად და უსაფრთხოდ იმუშაონ მომავალში.
