მთავრობამ ანაკლიის ტურისტულ ზონაში ოპერირებისათვის ინვესტორი შეარჩია. უკვე ცნობილია, რომ ანაკლიის ტურისტულ ზონაში მაღალი კლასის სასტუმროს თურქული კომპანია „ევრაზია" ააშენებს.
სასტუმროს ასაშენებლად, „ევრაზიას" სახელმწიფომ არასასოფლო სამეურნეო დანიშნულების 9 ათას 682 კვ.მ მიწის ნაკვეთი გადასცა, რაშიც „ევრაზია" 1 ლარას გადაიხდის. ინვესტორი ვალდებულია, ხელშეკრულების გაფორმებიდან 22 თვის განმავლობაში სასტუმრო ექსპლუატაციაში შეიყვანოს. შესაბამისი ხელშეკრულების ხელმოწერიდან 8 თვის ვადაში კი არანაკლებ 1 მილიონი ლარის ინვესტიცია განახორციელოს.
ეროვნული საინვესტიციო სააგენტოს დირექტორის, ქეთი ბოჭორიშვილის თქმით, "ევრაზიის" გარდა ანაკლიაში ოპერირებისთვის კიდევ რამდენიმე კომპანიაა გამოვლენილი, თუმცა პროექტების დამტკიცების შესახებ საბოლოო გადაწყვეტილება მთავრობამ უნდა მიიღოს.
მთავრობის ინფორმაციით, საქართველოს შავიზღვისპირეთის მთავარი მარგალიტის, ანაკლიის მშენებლობა უკვე დაიწყო. ინვესტორი მიწას, სასტუმროს პროექტებს და ყველა კომუნიკაციას სახელმწიფოსგან საჩუქრად მიიღებს. იმავდროულად, ინვესტორი 15 წლით მოგებისა და ქონების გადასახადისგან გათავისუფლება. ინვესტორებისთვის გადასაცემი უფასო მიწის ნაკვეთები განლაგებულია ესპანელი არქიტექტორების დაპროექტებული ბულვარის გასწვრივ.