2011 წლის იანვარ-მარტში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 1862 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 36 პროცენტით მეტია; აქედან ექსპორტი 464 მლნ. აშშ დოლარი იყო (35 პროცენტით მეტი), ხოლო იმპორტი - 1398 მლნ. აშშ დოლარი (36 პროცენტით მეტი). საქართველოს უარყოფითმა სავაჭრო ბალანსმა 2011 წლის იანვარ-მარტში 934 მლნ. აშშ დოლარი შეადგინა (36 პროცენტით მეტი).
"საქსტატის" ინფორმაციით, 2011 წლის იანვარ-მარტში საქართველოს საგარეო სავაჭრო ბრუნვამ ევროკავშირის ქვეყნებთან 484 მლნ. აშშ დოლარი შეადგინა, რაც წინა წლის შესაბამის მაჩვენებელზე 30 პროცენტით მეტია; აქედან ექსპორტი 94 მლნ. აშშ დოლარი იყო (9 პროცენტით მეტი), ხოლო იმპორტი - 390 მლნ. აშშ დოლარი (36 პროცენტით მეტი). საქართველოს საგარეო სავაჭრო ბრუნვაში ამ ქვეყნების წილმა 26 პროცენტი შეადგინა, მათ შორის ექსპორტში 20 პროცენტი და იმპორტში 28 პროცენტი. (2010 წლის იანვარ-მარტში - შესაბამისად 27, 25 და 28 პროცენტი). ევროკავშირის ქვეყნებზე მოდიოდა სავაჭრო დეფიციტის 32 პროცენტი (2010 წლის იანვარ-მარტში - 29 პროცენტი).
დსთ-ს ქვეყნებთან საგარეო სავაჭრო ბრუნვამ 2011 წლის იანვარ-მარტში 637 მლნ. აშშ დოლარი შეადგინა (2010 წლის იანვარ-მარტთან შედარებით 49 პროცენტით მეტი), აქედან ექსპორტი 192 მლნ. აშშ დოლარი დაფიქსირდა (62 პროცენტით მეტი), ხოლო იმპორტი - 446 მლნ. აშშ დოლარი (44 პროცენტით მეტი). საქართველოს საგარეო სავაჭრო ბრუნვაში ამ ქვეყნების წილი 34 პროცენტი იყო, მათ შორის ექსპორტში 41 პროცენტი და იმპორტში 32 პროცენტი. (2010 წლის იანვარ-მარტში - შესაბამისად 31, 35 და 30 პროცენტი). დსთ-ის ქვეყნებზე მოდიოდა სავაჭრო დეფიციტის 27 პროცენტი (2010 წლის იანვარ-მარტში - 28 პროცენტი).
"საქსტატში" აცხადებენ, რომ 2011 წლის იანვარ-მარტში ათი უმსხვილესი სავაჭრო პარტნიორის წილმა საქართველოს მთლიან საგარეო სავაჭრო ბრუნვაში 66 პროცენტი შეადგინა. უმსხვილეს სავაჭრო პარტნიორებად კვლავ თურქეთი (286 მლნ. აშშ დოლარი), უკრაინა (204 მლნ. აშშ დოლარი) და აზერბაიჯანი (193 მლნ. აშშ დოლარი) რჩება, თუმცა უნდა აღინიშნოს, რომ უკრაინამ, პოზიციურად, მესამედან მეორე ადგილზე გადაინაცვლა.
