ჩეხეთის პრეზიდენტმა პეტრ პაველმა პრაღაში, საერთაშორისო უსაფრთხოების კონფერენცია GLOBSEC-ის გახსნაზე განაცხადა, რომ უკრაინისთვის „ცუდ მშვიდობას“ ევროპისათვის ათწლეულების განმავლობაში მძიმე შედეგები ექნება.
მისი თქმით, უკრაინა არა მხოლოდ ევროპას იცავს, არამედ ომის წარმოების მიმართ ევროპის მიდგომასაც ცვლის.
პაველმა უკრაინა ევროპის ერთ-ერთ ყველაზე ძლიერ თავდაცვით მოთამაშედ მოიხსენია.
„მან აჩვენა გამორჩეული გამძლეობა, მიიღო დიდი საბრძოლო გამოცდილება და განავითარა ტექნოლოგიური ინოვაციები“, - განაცხადა ჩეხეთის პრეზიდენტმა.
მისი თქმით, უკრაინის მხარდაჭერა ქველმოქმედება კი არა, ევროპული უსაფრთხოების პირდაპირი ინვესტიციაა.
„თუ უკრაინა გაიმარჯვებს, ევროპა უფრო უსაფრთხო გახდება. ხოლო თუ უკრაინას არასასურველ მშვიდობაზე დათანხმებას აიძულებენ, ამის შედეგებს ჩვენ ათწლეულების განმავლობაში ვიგრძნობთ“, - განაცხადა პეტრ პაველმა.
