უკრაინის თავდაცვის მინისტრის მოადგილის თქმით, ქვეყნის შეიარაღებული ძალები ყირიმში შესაძლოა დეკემბრის ბოლოს დაბრუნდნენ, რუსეთთან ომი კი გაზაფხულის ბოლოს დასრულდეს. ამის შესახებ ვოლოდიმირ გავრილოვმა Sky News-თან ინტერვიუში განაცხადა.
მისი თქმით, რუსეთში შესაძლოა მოვლენები მოულოდნელად განვითარდეს, რამაც შეიძლება უკრაინას ყირიმის დაბრუნებაში ხელი შეუწყოს.
"ვფიქრობ, რომ რუსეთი შესაძლოა საკუთარ ქვეყანაში "შავი გედის" წინაშე აღმოჩნდეს და ამან შეიძლება ხელი შეუწყოს ჩვენს წარმატებას ყირიმთან დაკავშირებით. ასევე არსებობს სამხედრო ვარიანტიც, ძალების, რესურსების და სხვა რაღაცების ერთგვარი კომბინაციით, ჩვენ შეგვიძლია შევაბიჯოთ ყირიმში, მაგალითად, დეკემბრის ბოლომდე", - თქვა მან.
კითხვაზე, თუ რა შეიძლება იყოს ეს გაუთვალისწინებელი მოვლენა, გავრილოვმა თქვა, რომ ეს შეიძლება იყოს პუტინის ფიზიკური, ან პოლიტიკური "გაქრობა" რაიმე მიზეზის გამო.
მინისტრის მოადგილემ აღნიშნა, რომ მისი აზრით, რუსეთის მიერ ატომური თავდასხმის ალბათობა დაბალია.
"ეს [ტაქტიკური ბირთვული დარტყმა] არ არის საფრთხე, რომელიც შეგვიშლის ჩვენ ომის გაგრძელებაში ხელს", - თქვა მან.
რაც შეეხება კრემლთან მშვიდობიან მოლაპარაკებებს, გავრილოვმა თქვა, რომ ეს მხოლოდ მაშინ მოხდება, როცა რუსული ჯარი მზად იქნება დატოვოს უკრაინის ყველა სანტიმეტრი, მათ შორის ყირიმის ნახევარკუნძული.
"უკრაინაში საზოგადოების შიგნით არის თანხმობა, რომ ჩვენ ბოლომდე მივდივართ", - თქვა მან.
