„თბილისის ბაროკო ფესტივალი“ ფესტივალი გრძელდება და 11 ნოემბერს, 19:30-ზე კი რუსთველის ეროვნული თეატრის მცირე სცენაზე გაიმართება მსმენელებისთვის ძალიან ემოციური კონცერტი - „ქართული და ევროპული საეკლესიო მუსიკა“, რომელიც ფესტივალზე უკვე ტრადიციულად ყოველწელს ტარდება.
წელს, ამ კონცერტზე მსმენელების წინაშე შუასაუკუნეების პარიზის ღვთისმშობლის ტაძრის საეკლესიო მუსიკით წარდგება მომღერალთა ანსამბლი - “Organum” (საფრანგეთი), ხოლო ქართულ საეკლესიო და ამასთან ერთად ფოლკლორულ ნიმუშებს წარმოგვიდგენს ანსამბლი „რუსთავი“.
ანსამბლი “Organum” 1982 წელს მარსელ პერესმა დააარსა. ანსამბლის რეპერტუარი მოიცავს შუასაუკუნეების ევროპულ მუსიკას, რომელიც მე-6 საუკუნიდან იღებს სათავეს. უამრავი კონცერტი და სანახაობა აქვთ წარმოდგენილი ევროპაში, ჩრდილოეთ და სამხრეთ ამერიკაში, აფრიკასა და ახლო აღმოსავლეთში. ჩაწერილი აქვთ 40-ზე მეტი კომპაქტ-დისკი. რადიოსა და სატელევიზიო სივრცეში ხშირმა გამოჩენამ და ევროპის მდიდარი და მრავალფეროვანი მუსიკალური მემკვიდრეობის ჩვენებამ, ანსამბლს საშუალება მისცა გადამწყვეტი როლი შეესრულებინა შუასაუკუნეების მუსიკის აღორძინებაში. 1984 წლიდან 2000 წლამდე, ანსამბლი დაფუძნებული იყო სენანკის სააბატოსა და როიომონის ფონდში, სადაც მარსელ პერესმა ევროპის შუასაუკუნეების მუსიკის კვლევითი ცენტრი დააარსა (CERIMM). 2001 წელს ანსამბლი მუასაკის ყოფილ სააბატოში გადავიდა ახალი ინსტიტუციის, ძველებური მუსიკის კვლევითი ცენტრის (CIRMA) დასაარსებლად, რაც ადრეული მუსიკის კვლევისა და პრაქტიკის ახლანდელ ტრადიციებთან შერწყმის მიზნით შეიქმნა.
დღეს საქართველოში მოქმედებენ სხვადასხვა სახის ანსამბლები, რომლებიც სათუთად ინახავენ და ავითარებენ ხალხური შემოქმედების ტრადიციებს. ერთ-ერთი ასეთი ანსამბლი გახლავთ სახელმწიფო აკადემიური ანსამბლი “რუსთავი”. ის ნაყოფიერ შემოქმედებით საქმიანობას ეწევა: აღადგენს მივიწყებულ ძველ ხალხურ სიმღერებს, იწერს სიმღერებს კომპაქტურ დისკებზე, მართავს კონცერტებს, მონაწილეობს ფესტივალებში, რადიო და სატელევიზიო გადაცემებში, იღებს და ახმოვანებს კინოფილმებს, ბევრს მოგზაურობს უცხოეთში და ქართულ ფოლკლორს აცნობს მსოფლიოს მრავალ ქვეყანას.
“რუსთავი” შეიქმნა 1968 წელს. თავისი არსებობის მანძილზე მან ჩაატარა 5000-ზე მეტი კონცერტი, წარმატებით მოიარა მსოფლიოს 80-მდე ქვეყანა (ბევრი მათგანი რამდენჯერმე), გამოდიოდა ისეთ პრესტიჟულ დარბაზებში, როგორიცაა პარიზის “ოლიმპია”, “მოგადორი” და “ფლეიერის თეატრი”, ლონდონის “ალბერტ ჰოლი”, მოსკოვის დიდი თეატრი, სანკტ-პეტერბურგის, ვენის, ამსტერდამის, ნიუ-იორკის, ტოკიოს, ქაიროს, რომის, შანხაის, ბერლინის და მსოფლიოს სხვა ქალაქების დიდი საკონცერტო დარბაზები ოვაციებს უმართავდნენ “რუსთავის” საშემსრულებლო ხელოვნებას. პრესა მაღალ შეფასებას აძლევს მის გამოსვლებს.
„თბილისის ბაროკო ფესტივალი“ 9 ნოემბერს, რუსთაველის ეროვნული თეატრის მცირე სცენაზე, დიდი პრემიერით გაიხსნა.
საქართველოში პირველად შესრულდა იან დისმას ზელენკას უნიკალური ნაწარმოები - Missa Sanctissimae Trinitatis, ZWV 17 („წმინდა სამების მესა“).
„თბილისის ბაროკო ფესტივალი“ იმართება საქართველოს კულტურის, სპორტისა და ახალგაზრდობის სამინისტროს, თბილისის მერიის, იტალიის საელჩოსა და ფრანგული ინსტიტუტის მხარდაჭერით.
ფესტივალი 27 ნოემბრის ჩათვლით ჩატარდება.
ბილეთების შეძენა შესაძლებელია ვებ-გვერდზე www.biletebi.ge
