ავსტრიელი ვოლკერი ტურკი გახდა გაეროს ადამიანის უფლებათა უმაღლესი კომისარი. მისი კანდიდატურა 8 სექტემბერს დაამტკიცა ორგანიზაციის გენერალურმა ასამბლეამ, შემდეგ კი გენერალურმა მდივანმა ანტონიო გუტერეშმა.
57 წლის ტურკმა, რომელიც განათლებით იურისტია, თავისი კარიერის უმეტესი ნაწილი გაეროში გაატარა, ძირითადად ლტოლვილების საკითხებზე იყო ორიენტირებული.
ტურკი იყო ანტონიო გუტერეშის მოკავშირე და მასთან ერთად მუშაობს იმ დროიდან, როდესაც გუტერეში ხელმძღვანელობდა გაეროს ლტოლვილთა სააგენტოს (UNHCR).
ტურკი საკვანძო თანამდებობებს იკავებდა UNHCR-ის ოფისებსა და მისიებში რამდენიმე ქვეყანაში, მათ შორის კოსოვოსა და კონგოს დემოკრატიულ რესპუბლიკაში.
გაეროს ადამიანის უფლებათა უმაღლესი კომისრის თანამდებობაზე ვოკერ ტურკი ჩილეს ყოფილ პრეზიდენტს მიშელ ბაჩელეტს შეცვლის, რომელიც ამ თანამდებობას 2018 წლიდან იკავებდა. ბაჩელეტის უფლებამოსილების ვადა 2022 წლის აგვისტოს ბოლოს ამოიწურა.
