3 სექტემბერს, ჩეხეთის დედაქალაქ პრაღაში სულ მცირე 70 000 ადამიანი გამოვიდა ანტისამთავრობო აქციაზე.
აქციის მონაწილეები მოითხოვდნენ მთავრობის გადადგომას, ენერგიის ფასების შემცირებას და უკრაინაში რუსეთის შეჭრის მიმართ ნეიტრალური პოზიციის დაკავებას.
საპროტესტო აქცია ვაცლავის მოედანზე გაიმართა. ადგილობრივი პოლიციის შეფასებით, აქციაზე დაახლოებით 70 000 ადამიანი იმყოფებოდა, აქციის ორგანიზატორების მტკიცებით - 100 000.
ჩეხეთის საინფორმაციო სააგენტო ČTK-ის ცნობით, ანტისამთავრობო აქცია ლოზუნგით "ჩეხეთი უპირველეს ყოვლისა" დაორგანიზდა პოლიტიკური გაერთიანებების, მოქალაქეთა და ორგანიზაციების მიერ, რომლებიც არ ეთანხმებიან ჩეხეთის პროდასავლურ კურსს.
აქციის ერთ-ერთმა ორგანიზატორმა, პოლიტიკური მოძრაობა „ტრიკოლორის“ ლიდერმა ზუზანა მაერიოვამ თავის გამოსვლაში მოითხოვა გადასახადების შემცირება, რუსეთის წინააღმდეგ სანქციების გაუქმება და უკრაინისთვის იარაღის მიწოდების შეწყვეტა.
ჩეხეთის პრემიერ-მინისტრმა პეტრ ფიალამ განაცხადა, რომ აქცია ორგანიზებული იყო პრორუსული ძალების მიერ, რომლებიც ძირს უთხრიან ქვეყნის ეროვნულ ინტერესებს.
"აშკარაა, რომ რუსული პროპაგანდისტული და დეზინფორმაციული კამპანია ისევ და ისევ იჩენს თავს ჩვენს ქვეყანაში", - თქვა ფიალამ.
აქციის გამართვამდე ერთი დღით ადრე, ჩეხეთის ოპოზიციამ პარლამენტში სცადა მთავრობისთვის უნდობლობის გამოცხადება, თუმცა ვერ შეძლო. ხანგრძლივი დებატების შემდეგ, უნდობლობის გამოცხადებას 200 დეპუტატიდან მხოლოდ 84 მიემხრო. საჭირო იყო 101 ხმა.
