ომის დაწყების შემდეგ უკრაინიდან მარცვლეულით დატვირთული პირველი ხომალდი აფრიკაში ჩავიდა.
უკრანული მარცვლეულის პირველი პარტია დიდ შვებას მოგვრის ხანგრძლივი გვალვითა და კონფლიქტით დაზარალებულ აფრიკულ რეგიონებს.
ლიბანის დროშით მცურავმა გემმა Brave Commander-მა იუჟნის პორტიდან სტარტი ორი კვირის წინ აიღო და ჯიბუტიში ჩავიდა, რომელიც ინდოეთის ოკეანის სანაპიროზე მდებარეობს. მას 23 000 ტონა მარცვლეული გადაჰქონდა.
კიდევ 7000 ტონა მარცვლეული გზაშია. მთლიანი ტვირთი ეთიოპიისთვისაა განკუთვნილი. ის ერთი თვის განმავლობაში 1.5 მილიონი ადამიანის გამოსაკვებად იქნება საკმარისი.
ამ მარცვლეულის ტრანსპორტირების ხარჯები გაერომ აანაზღაურა, რადგან მისი მარაგები ლტოლვილების, კონფლიქტებისა და გვალვის შედეგად დევნილთა დასახმარებლად მცირდებოდა.
ხორბლის ტომრებში დაფასოებასა და სახმელეთო გზით ეთიოპიაში გადატანას ერთი კვირა დასჭირდება.
უკრაინული პორტებიდან მარცვლეულის საზღვაო გზით ტრანსპორტირება შესაძლებელი გახდა მას შემდეგ, რაც გასულ თვეში სტამბოლში გაეროსა და თურქეთის შუამავლობით, მიღწეულ იქნა შეთანხმება.
