რუსეთიდან გაზის მიწოდების მნიშვნელოვანი შემცირების მიუხედავად, გერმანნია სექტემბრის დასაწყისისთვის შეძლებს გაზის მარაგების შევსებას 85%-ით. იტყობინება გერმანიის ეკონომიკის სამინისტრო.
სამინისტროს ცნობით, 85%-იან ნიშნულამდე მიღწევას, მთავრობა ოქტომბრის თვეში ვარაუდობდა.
Der Spiegel-ის ცნობით, 25 აგვისტოს მდგომარებით, გაზის საცავები 81.78 პროცენტით იყო შევსებული. მეორე დღეს კი 82.2%-მდე შევსებას მოელოდნენ.
"გაზის საცავი უფრო სწრაფად ივსება, ვიდრე მოსალოდნელი იყო", - განუცხადა გერმანიის ეკონომიკის მინისტრმა რობერტ ჰაბეკმა Der Spiegel-ს.
მისი თქმით, ეს მარაგები შეიძლება გამოყენებულ იქნას მრეწველობისა და შინამეურნეობების უზრუნველყოფისთვის.
ევროკავშირის შესაბამისი დირექტივა ითვალისწინებს გერმანიაში გაზის საცავების შევსების აუცილებლობას 1 ოქტომბრამდე მინიმუმ 85 პროცენტით, 1 ნოემბრამდე - მინიმუმ 95 პროცენტით. აგვისტოს შუა რიცხვებში ამ მაჩვენებელმა 75 პროცენტს გადააჭარბა.
გაზისა და წყალბადის შენახვის სისტემების გერმანული ოპერატორების ასოციაციის INES-ის თანახმად, საცავის შევსება დაჩქარდა ზაფხულში გაზის მოხმარების შემცირებით და ჩრდილო-დასავლეთ ევროპიდან იმპორტის გაზრდით.
უკრაინაში გაჩაღებული ომისა და რუსეთის წინააღმდეგ დაწესებული სანქციების ფონზე, "გაზპრომმა" უკვე შეამცირა გაზის მიწოდება ევროპის ქვეყნებში.
27 ივლისიდან Nord Stream-ის გავლით გაზის მიწოდება მისი გამტარუნარიანობის 20 პროცენტამდე შემცირდა, ხოლო 19 აგვისტოს გაზპრომმა განაცხადა, რომ 31 აგვისტოდან 2 სექტემბრამდე საერთოდ შეაჩერებს მილსადენის მუშაობას.
