24 აგვისტოს გამოქვეყნებული ოფიციალური სტატისტიკური მონაცემების თანახმად, გაერთიანებულ სამეფოში ივნისში რუსული წიაღისეული საწვავის იმპორტი არ დაფიქსირებულა მას შემდეგ, რაც ენერგომატარებლების იმპორტი დაიწყო 25 წლის წინ.
ამავდროულად, ბრიტანეთის სტატისტიკის სამსახურის (ONS) ინფორმაციით, სხვა რუსული საქონლის იმპორტი 97%-ით შემცირდა.
უკრაინაში რუსეთის მიერ ომის გაჩაღების შემდეგ, ბრიტანეთის მიერ დაწესებული სანქციები მოიცავდა ზოგიერთი რუსული საქონლის სრულად აკრძალვას ან ტარიფების გაზრდას.
დიდმა ბრიტანეთმა ასევე განაცხადა, რომ 2022 წლის ბოლომდე შეწყვეტს რუსული ნავთობისა და ნავთობპროდუქტების იმპორტს.
ეროვნული სტატისტიკის ოფისის ინფორმაციით, მარტიდან დაფიქსირდა რუსეთიდან საწვავის იმპორტის მკვეთრი კლება, ხოლო ივნისში ნულამდე დაეცა.
2021 წელს რუსეთი იყო ბრიტანეთისთვის გადამუშავებული ნავთობის უმსხვილესი მიმწოდებელი.
"ივნისში გაერთიანებულ სამეფოში რუსეთიდან გადამუშავებული ნავთობის, ნედლი ნავთობის, გაზის ან ქვანახშირის, კოქსისა და ბრიკეტის იმპორტი არ განხორციელებულა“, - ნათქვამია სტატისტიკის ოფისის ინფორმაციაში.
უწყების ინფორმაციით, ამავდროულად, გადამუშავებული ნავთობის იმპორტი გაიზარდა საუდის არაბეთიდან, ნიდერლანდებიდან, ბელგიასა და ქუვეითიდან.
ამავე დროს, მიმდინარე წლის პირველ ნახევარში დიდ ბრიტანეთში გაიზარდა გაზის შიდა წარმოება 26%-ით, გასული წლის ანალოგიურ პერიოდთან შედარებით.
ONS-ის თანახმად, ივნისში რუსული საქონლის იმპორტის მოცულობა 33 მილიონ ფუნტამდე დაეცა, რაც 1997 წლის იანვარში მონაცემების წარმოების დაწყების შემდეგ, ყველაზე დაბალი მაჩვენებელია.
