თურქეთის პრეზიდენტმა რეჯეფ თაიფ ერდოღანმა ყირიმის მეორე პლატფორმის სამიტზე სიტყვით გამოსვლისას ხაზგასმით აღნიშნა, რომ რუსეთის მიერ ყირიმის ოკუპაციის დასრულება საერთაშორისო სამართლის დე ფაქტო მოთხოვნაა და გლობალური უსაფრთხოებისა და სტაბილურობის მნიშვნელოვანი ელემენტია.
"თურქეთი თავიდანვე ღიად აცხადებდა, რომ ყირიმის ანექსია არის არაკონსტიტუციური და უკანონო და არ აღიარებს მას, ეს პრინციპული პოზიციაა როგორც სამართლებრივი, ასევე მორალური მიზეზთა გამო.
საერთაშორისო სამართალი არსებითად განსაზღვრავს, რომ ყირიმი უკრაინას უნდა დაუბრუნდეს, რომლის განუყოფელი ნაწილიც არის იგი", - ხაზგასმით აღნიშნა თურქეთის პრეზიდენტმა.
მან დასძინა, რომ უკრაინის ტერიტორიული მთლიანობის, სუვერენიტეტისა და პოლიტიკური ერთიანობის დაცვა "უაღრესად მნიშვნელოვანია არა მხოლოდ რეგიონული, არამედ გლობალური უსაფრთხოებისა და სტაბილურობისთვის".
"თურქეთისთვის ასევე პრიორიტეტულია ყირიმელი თათრების უსაფრთხოებისა და კეთილდღეობის უზრუნველყოფა, რომლებიც ყირიმის ერთ-ერთი ძირძველი ხალხია. ჩვენი ყირიმელი თათრები ყურადღებით ადევნებენ თვალს ყირიმში მიმდინარე მოვლენებს", - დასძინა ერდოღანმა.
ყირიმის პლატფორმის სამიტს წელს დაახლოებით 60 ქვეყნისა და საერთაშორისო ორგანიზაციის წარმომადგენლები ესწრებიან, მათ შორის 40 ქვეყნის პრეზიდენტი და პრემიერ-მინისტრი.
უსაფრთხოების ზომების გათვალისწინებით, სამიტი ონლაინ ფორმატში იმართება.
