ბრაზილიის პირველი იმპერატორის, პედრუ I-ის ბალზამირებულ გული პორტუგალიიდან ჩაიტანეს ბრაზილიის დამოუკიდებლობის 200 წლის იუბილესთან დაკავშირებით.
სადღესასწაულო დღეების დასრულების შემდეგ, გულს კვლავ პორტუგალიაში, საპორტო ქალაქ პორტოში დააბრუნებენ.
გული, რომელიც ფორმალდეჰიდით სავსე კოლბაში ინახება, ბრაზილიაში სამხედრო თვითმფრინავით ჩაიტანეს. მას თან ახლდა პორტოს მერი, რუი მორეირა.
ბრაზილის დამოუკიდებლობის დღესთან დაკავშირებით, იმპერატორის გული ტრანსპორტირების ნებართვა პორტუგალიის ხელისუფლებამ გასცა.
ბალზამირებულ ორგანოს ბრაზილიაში სამხედრო პატივით დახვდებიან, მიაგებენ პატივს საზეიმო საარტილერიო ზალპებით, შესრულდება ეროვნული და დამოუკიდებლობის ჰიმნები, რის შემდეგაც ბრაზილიის საგარეო საქმეთა სამინისტროს შენობაში გამოფენენ.
იმპერატორი პედრო 1789 წელს პორტუგალიის სამეფო ოჯახში დაიბადა. იმ დროისთვის, ბრაზილია პორტუგალიის უდიდესი კოლონია იყო. პორტუგალიაში ნაპოლეონ პირველის არმიის შეჭრის შემდეგ, სამეფო ოჯახმა ბრაზილიას შეაფარა თავი.
როდესაც პედროს მამა, მეფე ჟუან VI, 1821 წელს დაბრუნდა პორტუგალიაში, თავისი 21 წლის ვაჟი რეგენტად, ბრაზილიის სამართავად დატოვა.
ერთი წლის შემდეგ, ახალგაზრდა რეგენტი დაუპირისპირდა პორტუგალიის პარლამენტს, რომელსაც სურდა ბრაზილიის კოლონიად შენარჩუნება და უარყო მისი მოთხოვნა სამშობლოში დაბრუნების შესახებ.
1822 წლის 7 სექტემბერს მან გამოსცა ბრაზილიის დამოუკიდებლობის დეკლარაცია და მალევე აკურთხეს იმპერატორად.
მოგვიანებით, ის დაბრუნდა პორტუგალიაში, რათა თავის ქალიშვილს დახმარებოდა სამეფო ტახტისთვის ბრძოლაში.
1834 წელს, ბრაზილიის პირველი იმპერატორი პედრო I პორტუგალიაში ტუბერკულოზით გარდაიცვალა. ის 35 წლის იყო.
გარდაცვალებამდე იმპერატორმა ითხოვა, რომ მისი სიკვდილი შემდეგ, გული გამოეყოთ სხეულიდან და პორტოში, ლაპას ღვთისმშობლის ეკლესიაში გადაეტანათ. დღეს ის ამ ეკლესიის საკურთხეველში ინახება.
პედრო პირველი ცხედარი ბრაზილიაში გადაასვენეს 1972 წელს, ქვეყნის დამოუკიდებლოს 150 წლის იუბილისადმი დაკავშირებული ღონისძიებების ფარგლებში. ის დაკრძალულია სან პაულოში მდებარე საძვალეში.
