22 აგვისტოს, შეერთებულმა შტატებმა და სამხრეთ კორეამ დაიწყეს ერთობლივი ყოველწლიური მასშტაბური სამხედრო წვრთნები, სახელწოდებით Ulchi Freedom Shield.
წვრთნებში მონაწილეობს ათასობით ჯარისკაცი და აერთიანებს სახმელეთო, საზღვაო და საჰაერო ძალებს. სამხედრო მანევრები 1-ელ სექტემბრამდე გასტანს.
ბოლოს ეს წვრთნები 4 წლის წინ ჩატარდა. ერთი მხრივ წვრთნების ჩატარებას კორონავირუსის პანდემია აფერხებდა, მეორე მხრივ აშშ და სეული ცდილობდნენ წვრთნების არჩატარებით დაეყოლიებინათ ჩრდილოეთ კორეა, დათმობებზე წასულიყო განიარაღების შესახებ მოლაპარაკებებში.
ამჟამად აშშ-ს დაახლოებით 28,500 ჯარისკაცი ჰყავს განლაგებული სამხრეთ კორეაში.
სამხედრო წვრთნები იმართება კორეის ნახევარკუნძულზე დაძაბულობის მატების ფონზე მას შემდეგ, რაც წარუმატებელი გამოდგა აშშ-ის წინა ადმინისტრაციის მცდელობები, რომლებიც ჩრდილოეთ კორეასთან დაახლოების მიზნით იქნა გადადგმული.
ჩრდილოეთ კორეამ წელს უპრეცედენტო რაოდენობის იარაღის გამოცდა ჩაატარა. აშშ-ისა და სამხრეთ კორეის ოფიციალური პირები გამოვიდნენ გაფრთხილებით, რომ ფხენიანი ემზადება ბირთვული გამოცდის ჩასატარებლად.
