შეერთებული შტატები მსოფლიოს ღარიბი რეგიონებისთვის გასანაწილებად შეისყიდის დაახლოებით 150 000 ტონა უკრაინულ მარცვლეულს, როგორც შეთანხმების ნაწილი უკრაინის შავი ზღვის პორტებიდან მარცვლეულის ექსპორტის განახლებაზე.
აღნიშნული სიახლის შესახებ გაეროს სასურსათო პროგრამის (WFP) ხელმძღვანელმა დევიდ ბისლიმ Associated Press-ს განუცხადა.
ბისლის განცხადებით, მარცვლეულის საბოლოო დანიშნულების ადგილები ჯერ კიდევ არ არის დადასტურებული და მოლაპარაკებები კვლავაც მიმდინარეობს.
აფრიკის რეგიონის მოსახლეობა, რომელიც მოიცავს ჯიბუტს, სომალის, სუდანსა და ეთიოპიას, გვალვის გამო შიმშილობის საფრთხის წინაშე აღმოჩნდა. სომალიში ათასობით ადამიანი უკვე გარდაიცვალა არასრულფასოვანი კვების გამო, საერთო ჯამში კი, გაეროს მონაცემებით, რეგიონში 22 მილიონი ადამიანი შიმშილობს.
ბისლის განცხადებით, დიდი ხნის ნანატრი ხომალდი უკრაინიდან 23 000 ტონა მარცვლეულს მიაწვდის რეგიონს, რაც საკმარისი იქნება 1.5 მილიონი ადამიანის გამოსაკვებად ერთი თვის განმავლობაში.
მოელიან, რომ მარცვლეულით დატვირთული ხომალდი ჯიბუტის პორტში 26 ან 27 აგვისტოს შევა. ამის შემდეგ, ხორბალი სახმელეთო გზით გაიგზავნება ჩრდილოეთ ეთიოპიაში, სადაც მილიონობით ადამიანი გვალვისა და სისხლიანი ეთნიკური კონფლიქტის პირობებში ცხოვრობს.
უკრაინაში რუსეთის სასტიკმა შეჭრამ შავი ზღვის გავლით უკრაინული ხორბლის ექსპორტი შეაჩერა, რამაც გლობალური სასურსათო დეფიციტი გამოიწვია.
ივლისში, რუსეთმა და უკრაინამ, გაეროს და თურქეთის შუამავლობით მიაღწიეს შეთანხმებას მარცვლეულის ექსპორტის განახლების შესახებ. ბოლო მონაცემებით, უკრაინული პორტები დატოვა მარცვლეულით დატვირთულმა 27-მა ხომალდმა.
