ფეშენებელური სუპერიახტა, რომელიც სანქცირებულ რუს ოლიგარქს ჩამოართვეს, აუქციონზე გაიყიდება.
The Guardian-ის ცნობით, საუბარია რუსი მილიარდერის დიმიტრი პუმპიანსკის იახტა Axioma-ზე.
სუპერიახტა გიბრალტარის ხელისუფლებამ მარტში დააკავა, მას შემდეგ, რაც ამერიკულმა ბანკმა JPMorgan-მა საჩივარი შეიტანა სანქცირებული პირისგან დავალიანების ამოღების მიზნით.
JPMorgan-ი ამტკიცებს, რომ ოლიგარქს ბანკში 20-მილიონიანი სესხი ჰქონდა, რაც არ გადაიხადა.
დიმიტრი პუმპიანსკის, რომლის ქონება 2 მილიარდ დოლარს აღემატება, დიდმა ბრიტანეთმა, ევროკავშირმა და აშშ-მა სანქციები დაუწესეს რუსეთის მიერ უკრაინაში შეჭრასთან დაკავშირებით.
სანქციების დაწესების შემდეგ, 58 წლის პუმპიანსკიმ ფოლადის მილების კომპანიის OAO TMK-ის დირექტორთა საბჭო დატოვა.
პუმპიანსკის იახტა Axioma 75 მილიონ დოლარად არის შეფასებული. აუქციონი 23 აგვისტოს არის დაგეგმილი.
ეს თებერვალში უკრაინაში რუსეთის შეჭრის შემდეგ რუსებისთვის ჩამორთმეული ძვირადღირებული იახტების გაყიდვის პირველი შემთხვევაა.
