სომალის დედაქალაქ მოგადიშოში, სასტუმრო "ჰაიატს" შეიარაღებული პირები თავს დაესხნენ.
გავრცელებული ინფორმაციით, შეიარაღებულმა პირებმა სასტუმროს მიმდებარედ ორი ბომბი ააფეთქეს, რის შედეგადაც მოარღვიეს დაწესებულების კარიბჭე, ცეცხლი გახსნეს და შენობაში შეიჭრნენ.
შეიარაღებულ თავდასხმას სულ მცირე 15 ადამიანი ემსხვერპლა, არიან დაშავებულები. მოგადიშუს კლინიკის განცხადებით, სავარაუდოდ მსხვერპლთა რაოდენობა გაიზრდება, რადგან ბევრი დაშავებული მძიმე მდგომარეობაშია.
მომხდარზე პასუხისმგებლობა უკვე აიღო ტერორისტულ დაჯგუფება "ალ-ყაიდასთან" დაკავშირებულმა კიდევ ერთმა ტერორისტულმა მოძრაობამ "ალ-შაბაბმა".
როგორც იუწყებიან, ტერორისტებს სასტუმროს ტერიტორიის ნაწილი კვლავ დაკავებული აქვთ. სომალის უსაფრთხოების ძალები იტყობინება, რომ სასტუმროს უმეტესი ნაწილი თავდასმსხმელთაგან გაათავისუფლეს.
სასტუმროს ხშირად სტუმრობენ კანონმდებლები და ხელისუფლების წარმომადგენლები. ამ თავდასხმის დროს, უსაფრთოხების ორი თანამშრომელი, მათ შორის მოგადიშუს დაზვერვის უფროსი დაიჭრა.
მანამდე, 13 აგვისტოს, CNN-ის ინფორმაციით, სომალიში აშშ-ის მიერ დრონით განხორციელებულ თავდასხმას ტერორისტული დაჯგუფების "ალ-შაბაბის" 13 წევრი ემსხვერპლა. უცნობია, სასტუმროზე თავდასხმა უკავშირდება თუ არა დრონით განხორციელებულ იერიშს.
"ალ-შაბაბის" დაჯგუფება სომალის ხელისუფლებას წლებია ებრძვის.
