რუსული კონცერნი "გაზპრომი" 3 დღით, 31 აგვისტოდან 2 სექტემბრის ჩათვლით, გაზსადენის "ჩრდილოეთ ნაკადის" გავლით გაზის მიწოდებას შეაჩერებს. ამის შესახებ კომპანიამ პარასკევს, 19 აგვისტოს განაცხადა.

"გაპრომის" თანახმად, "პორტოვაიას" კომპრესორის სადგურზე, Trent 60-ის აგრეგატი, რომელიც მილსადენში ნედლეულის გადატუმბვაზეა პასუხისმგებელი, მოითხოვს დაგეგმილ კაპიტალურ შეკეთებას და მოვლას.

მათივე ცნობით, სამუშაოები Siemens-ის სპეციალისტებთან ერთად განხორციელდება.

"ტექნიკური სამუშაოების შემდეგ, გაზის მიწოდება განახლდება დღეში 33 მილიონი კუბური მეტრის ოდენობით", - ირწმუნება "გაზპრომი".

ეს იქნება გაზსადენის გამტარუნარიანობის დაახლოებით 20 პროცენტი.

ამავდროულად, რუსეთს ჯერ კიდევ არ მიუღია Siemens-ის ტურბინა გაზსადენ "ჩრდილოეთის ნაკადისთვის", რომელსაც კანადაში ტექნიკური სამუშაოები ჩაუტარდა და ივლისის შუა რიცხვებიდან გერმანიაში იმყოფება.

Siemens Energy-ის წარმომადგენლის თქმით, რუსეთი უარს ამბობს საბაჟო დოკუმენტაციის წარმოდგენაზე, რათა მოხდეს ტურბინის რუსეთში ტრანსპორტირება.

აგვისტოს დასაწყისში, გერმანიის კანცლერმა ოლაფ შოლცმა მოსკოვის მიმართ გამოთქვა ბრალდება, რომ ის განზრახ ბლოკავს გაზის მოცულობის გაზრდისთვის საჭირო ტურბინის რუსეთში გადაზიდვას, რადგან არ წარმოადგენს შესაბამის საბუთებს.

"გაზპრომმა", "ჩრდილოეთის ნაკადი 1-ში" გატარებული გაზის მოცულობა ერთ მეხუთედამდე შეამცირა 27 ივლისის შემდეგ. ამის მიზეზად ასახელებს იმ გარემოებას, რომ მას არ მიუღია ტურბინა, რომელიც შეკეთების მიზნით გაიგზავნა სხვაგან.