საერთაშორისო სააგენტო Reuters-ის ცნობით, გერმანია რუსულ ნავთობს ამერიკული ნავთობით ანაცვლებს.
სააგენტოს ინფორმაციით, ერთი თვის განმავლობაში, ლუიზიანის პორტიდან ამერიკული ნავთობით დატვირთული მეორე ხომალდი დაიძრა გერმანიის პორტ როსტოკისკენ.
ტანკერზე, სახელწოდებით Ise Princess, 570 000 ბარელი ნავთობია დატვირთული.
ამერიკულმა ნავთობმა, ნორვეგიიდან, დასავლეთი აფრიკიდან და ახლო აღმოსავლეთიდან ექსპორტირებულ ნავთობთან ერთად, უნდა ჩაანაცვლოს რუსული ნავთობი, რომელიც "დრუჟბას" მილსადენის მიედინება ევროპისკენ.
მექსიკის ყურეში მოპოვებული Mars-ის მარკის ნავთობი შემადგენლობით რუსული Urals-ის მსგავსია. ამერიკული ნავთობის პირველი პარტია, რომელიც გერმანიის პორტ როსტოკში აგვისტოს დასაწყისში შევიდა, Schwedt-ის ნავთობგადამამუშავებელმა საწარმომ უკვე მიიღო.
Schwedt-ის საწარმოს უდიდესი წილის მფლობელია რუსული კონცერნტი "როსნეფტი". გასულ კვირას, "როსნეფტი" გაფრთხილებით გამოვიდა, რომ გერმანიაში საწვავის ფასები გაიზრდება საზღვაო გზით შემოტანილი ნავთობის მაღალი ფასის გამო.
ევროკავშირი წლის ბოლომდე რუსეთიდან იმპორტირებული ნავთობის 90%-ით შემცირებას გეგმავს. გასულ თვეში, ცნობილი გახდა, რომ ევროპა ამერიკული ნავთობის უმსხვილესი მყიდველი გახდა.
აშშ-ის ვაჭრობის დეპარტამენტის მონაცემებით, იანვარ-მაისში ევროპამ 213,1 მილიონი ბარელი ნავთობი შეიძინა, აზიამ - 191,1 მილიონი ბარელი. ბოლო ასეთი მონაცემები, 6 წლის წინ დაფიქსირდა.
