რუსული მაღალი სიზუსტის იარაღი, წლებითა და ათწლეულებით უსწრებს უცხოურ ანალოგებსა და მნიშვნელოვნად აღემატება მათ ტაქტიკური და ტექნიკური მახასიათებლებით. განაცხადა რუსეთის პრეზიდენტმა პუტინმა სამხედრო-ტექნოლოგიურ ფორუმ "არმია 2022"-ზე.
თავისი გამოსვლის უდიდესი ნაწილი პუტინმა რუსეთისა და მისი შეიარაღებული ძალების განდიდებას დაუთმო.
"განსაკუთრებით საინტერესოა პერსპექტიული ნიმუშები და სისტემები, რომლებიც მომავალზეა ორიენტირებული და განსაზღვრავს შეიარაღებული ძალების მომავალს", - დასძინა მან.
ამასთან, პუტინმა განაცხადა, რომ რუსეთი მზად არის, თავისი შეიარაღება შესთავაზოს მის მოკავშირეებს მსოფლიოს მასშტაბით.
"რუსეთი გულწრფელად აფასებს ისტორიულად ძლიერ, მეგობრულ, ჭეშმარიტად სანდო კავშირებს ლათინური ამერიკის, აზიისა და აფრიკის სახელმწიფოებთან და მზად არის შესთავაზოს თავის პარტნიორებსა და მოკავშირეებს უახლესი ხარისხის იარაღები", - თქვა მან.
პუტინის მტკიცებით, რუსულ იარაღს მთელ მსოფლიოში სამხედრო პროფესიონალები აფასებენ, როგორც საიმედოს, ეფექტურსა დ ხარისხიანს.
მისი თქმით, რუსეთი მხარს უჭერს "სამხედრო-ტექნიკური თანამშრომლობის ფართო და ყოვლისმომცველ განვითარებას".
"დღეს, სტაბილურად განვითარებადი მრავალპოლარული სამყაროს პირობებში, ეს განსაკუთრებით მნიშვნელოვანია. ჩვენ ძალიან ვაფასებთ, რომ დღეს ჩვენს ქვეყანას ჰყავს მრავალი მოკავშირე, პარტნიორი, თანამოაზრე ადამიანი სხვადასხვა კონტინენტზე", - აღნიშნა პუტინმა.
პუტინის თქმით, ეს ის სახელმწიფოებია, რომლებიც "ქედს არ ხრიან ე.წ. ჰეგემონის წინაშე და მათ ლიდერები ნამდვილ მამაკაცურ ხასიათს ავლენენ".
რუსეთის პრეზიდენტის განცხადებით, რუსეთსა და მის მოკავშირეებს შორის ურთიერთბები სამხედრო-ტექნიკური თანამშრომლობის სფეროში უზრუნველყოფს სტაბილურობასა და უსაფრთხოებას მსოფლიოში.
პუტინი უკრაინაში რუსეთის მიერ გაჩაღებულ ომსაც შეეხო და თქვა, რომ "რუსი სამხედროები ნაბიჯ-ნაბიჯ მიჰყვებიან დონბასის განთავისუფლების გეგმას".
