შეერთებული შტატების სენატის საგარეო საქმეთა კომიტეტის წამყვანი რესპუბლიკელი წევრი, სენატორი ჯიმ რიში რუსეთის მიერ ოკუპირებულ ცხინვალის რეგიონში ე.წ. საპრეზიდენტო არჩევნების მეორე ტურს ეხმიანება.
სენატორი რიშის განცხადებით, უკრაინა არ არის ერთადერთი ქვეყანა, რომლის დაშლას და განადგურებასაც პუტინი ესწრაფვის.
"სამხრეთ ოსეთი არის რუსეთის მიერ ოკუპირებული საქართველოს ორი რეგიონიდან ერთ-ერთი. მე და საერთაშორისო საზოგადოება ვგმობთ გუშინდელ უკანონო არჩევნებს სამხრეთ ოსეთში და ვაგრძელებთ საქართველოს სუვერენიტეტის მხარდაჭერას", – წერს სენატორი სოციალურ ქსელში.
შეგახსენებთ, ოკუპირებულ ცხინვალის რეგიონში ე.წ. საპრეზიდენტო არჩევნების მეორე ტური 8 მაისს გაიმართა. მეორე ტურში პარტია "ნიხასის" თავმჯდომარემ, ალან გაგლოევმა დაამარცხა მოქმედი, ე.წ. პრეზიდენტი ანატოლი ბიბილოვი.
