რუსეთ-უკრაინას შორის დაძაბულობის ფონზე, ამერიკელი მედესანტეები აღმოსავლეთ ევროპაში გაფრინდნენ. იუწყება "ამერიკის ხმა".
სამხედრო-სატრანსპორტო თვითმფრინავი ჩრდილოეთ კაროლინის შტატში მდებარე ფორტ ბრაგის ბაზიდან აფრინდა.
დაახლოებით 1700 ჯარისკაცი, ძირითადად 82-ე საჰაერო-სადესანტო დივიზიიდან, გაიგზავნება პოლონეთში, კიდევ 300 მედესანტე განლაგდება გერმანიაში. ამასთან, გერმანიაში განლაგებული ბაზიდან 1000-მდე სამხედრო გადავა რუმინეთში.
ცოტა ხნის წინ ცნობილი გახდა, რომ შეერთებული შტატები, ევროპაში არსებული ვითარებისა და რუსეთისგან მოსალოდნელი საფრთხეების გათვალისწინებით, დამატებით ძალებს განალაგებს გერმანიაში, პოლონეთსა და რუმინეთში.
პენტაგონის პრესსპიკერის ჯონ კირბის განცხადებით, გერმანიაში დისლოცირებული ათასი სამხედრო რუმინეთში გადაინაცვლებს და შეუერთდება რუმინეთში მყოფ 900 ამერიკელ ჯარისკაცს. გარდა ამისა, აშშ-დან პოლონეთსა და გერმანიაში კიდევ 2000 ჯარისკაცის გადაყვანა მოხდება.
რუსეთის საგარეო საქმეთა მინისტრის მოადგილის ალექსანდრ გრუშკოს განცხადებით, "ვაშინგტონის გადაწყვეტილება არის დესტრუქციული ნაბიჯი, რომელიც ზრდის სამხედრო დაძაბულობას".
ევროპაში დამატებითი ძალების განლაგებას მიესალმა ნატო-ს გენერალური მდივანი იენს სტოლტენბერგი.
ფოტო: AP
