უკრაინის შეიარაღებული ძალების რაოდენობა მომდევნო სამი წლის განმავლობაში 100 000 ადამიანით გაიზრდება. ამის შესახებ უკრაინის პრეზიდენტმა ვოლოდიმირ ზელენსკიმ უმაღლეს რადაში გამოსვლისას განაცხადა და დასძინა, რომ შესაბამის განკარგულებას ხელი უკვე მოაწერა.
ვოლოდიმირ ზელენკის განცხადებით, ეს განკარგულება არ უკავშირდება ომის საფრთხეს, არამედ უკრაინის არმიის პროფესიული გაძლიერების საწინდარია, რომელმაც "უნდა უზრუნველყოს უკრაინაში მშვიდობის დამყარება".
ამავდროულად, ზელენსკიმ მოუწოდა კანონმდებლებს, შეინარჩუნონ ერთიანობა და არ დათესონ პანიკა რუსეთის სამხედრო თავდასხმის საფრთხის გამო.
რადაში გამოსვლისას ზელენსკიმ იმედი გამოთქვა, რომ "ნორმანდიული ფორმატის" ფარგლებში, რუსეთთან, საფრანგეთსა და გერმანიასთან სამშვიდობო მოლაპარაკებების შემდეგი რაუნდის თარიღი უახლოეს მომავალში შეთანხმდება.
ზელენსკის განცხადებით, ამჟამად მიმდინარეობს მუშაობა ბერლინში "ნორმანდიული ფორმატის" ფარგლებში მრჩევლების შეხვედრის თარიღის შეთანხმებაზე.
"იმედი მაქვს, ამ შეხვედრაზე მიღწეული იქნება შეთანხმება ნორმანდიული ოთხეულის ლიდერების შეხვედრაზე", - თქვა ზელენსკიმ.
დასავლეთის დაზვერვის ცნობით, რუსეთმა ანექსირებულ ყირიმსა და უკრაინის საზღვარზე 120 000-მდე ჯარისკაცი განათავსა. მოსკოვი უარყოფს ახალი შეჭრისთვის მზადებას და ევროპელებსა და ამერიკელებს უკრაინის შეიარაღებასა და რუსეთის საზღვრებთან მანევრების ჩატარებაში ადანაშაულებს.
დასავლეთი მოსკოვს უკრაინის საზღვრიდან ჯარების გაყვანისკენ მოუწოდებს და რუსეთის ფედერაციის მიერ მეზობელ სახელმწიფოზე შესაძლო თავდასხმის შემთხვევაში ფართომასშტაბიანი სანქციებით იმუქრება.
