უკრაინის ეროვნული პოლიციის ინფორმაციით, 30 იანვარს საღამოს დააკავეს ადამიანთა ჯგუფი, რომლებიც ქვეყანაში მასობრივი არეულობის მოწყობას გეგმავდნენ.
სხვა დეტალები უწყებას არ გაუსაჯაროებია, თუმცა ცნობილია, რომ დანიშნულია საგანგებო ბრიფინგი (კიევის დროით 10 საათზე), სადაც ამ საკითხზე ისაუბრებენ უკრაინის შინაგან საქმეთა მინისტრი დენის მონასტირსკი და ეროვნული პოლიციის უფროსი იგორ კლიმენკო.
ბოლო თვეებია, ვითარება უკრაინაში დაძაბულია, რასაც რუსეთის მიერ მის საზღვრებთან ათასობით სამხედროს კონცენტრირება განაპირობებს.
დასავლეთი შიშობს, რომ კრემლი უკრაინაში სამხედრო ინტერვენციის გარდა შესაძლოა გეგმავდეს უკრაინის სტაბილურობისათვის ძირგამომთხრელ აქტივობებს, მათ შორის კიბერთავდასხმებსა და შიდა არეულობის ორგანიზებას.
რამდენიმე დღის წინ, ბრიტანეთის საგარეო დაზვერვამ განაცხადა, რომ გამოააშკარავეს რუსეთის სპეცსამსახურების გეგმები უკრაინაში ხელისუფლების ცვლილების შესახებ. დაზვერვის ინფორმაციით, კრემლს უკრაინაში პროპუტინისტური მმართველის დანიშვნა აქვს განზრახული.
10 იანვარს უკრაინის უსაფრთხოების სამსახურმა განაცხადა, რომ ოდესაში დააკავეს რუსეთის სამხედრო დაზვერვის აგენტი, რომელიც ტერაქტს გეგმავდა. უწყების განცხადებით, აგენტის მთავარ ამოცანას წარმოადგენდა ოდესის ოლქში დივერსიებისა და ტერაქტების გზით პოლიტიკური ვითარებისთვის ძირის გამოთხრა.
