უკრაინის თავდაცვის სამინისტრომ უარყო დასავლურ მედიაში გავრცელებული ინფორმაცია იმის თაობაზე, რომ რუსეთი უკრაინის საზღვართან თავმოყრილ ჯარებს სისხლითა და სამედიცინო მასალებით ამარაგებს.
სამინისტროს განცხადებაში აღნიშნულია, რომ უკრაინის პარტნიორ ქვეყნებს კიევისთვის მსგავსი ინფორმაცია არ მიუწოდებიათ და სიტუაციის მონიტორინგი "ამგვარი აქტივობებს არ აღრიცხავს".
თავდაცვის სამინისტრომ ამ თემაზე მედიაში გავრცელებულ პუბლიკაციებს საინფორმაციო "ინტერვენცია" და "ინფორმაციულ-ფსიქოლოგიური ომის ელემენტი" უწოდა, რომლის მიზანია "საზოგადოებაში შიშისა და პანიკის დათესვა".
მანამდე სააგენტო Reuters-ი აშშ-ის ადმინისტრაციაში მომუშავე წყაროებზე დაყრდნობით, იტყობინებოდა, რომ რუსეთი ბოლო ორი კვირის განმავლობაში გადასხმისთვის საჭირო სისხლსა და სხვა სამედიცინო საშუალებებს აწვდიდა უკრაინის საზღვართან თავმოყრილ სამხედრო ნაწილებს.
სააგენტოს ცნობით, თუ საბრძოლო ქმედებები ნამდვილად დაიწყო, სისხლის მარაგები დაჭრილი ჯარისკაცების სამკურნალოდ იქნება გამოყენებული.
ამასთან, ხაზგასმულია, რომ სამედიცინო აღჭურვილობისა და სისხლის მიწოდება აუცილებლად იმას არ ნიშნავს, რომ სამხედრო ინტერვენცია გარდაუვალია, თუმცა რუსეთის მაღალ სამხედრო მზადყოფნაზე მიუთითებს.
ცოტა ხნით ადრე, გამოცემა The Wall Street Journal-ი წერდა, რომ რუსეთმა უკრაინის საზღვართან სამედიცინო ქვედანაყოფები გადაისროლა.
