შეერთებული შტატების პრეზიდენტმა ჯო ბაიდენმა დაადასტურა, რომ უზენაესი სასამართლოს მსაჯულის თანამდებობაზე შავკანიან ქალს წარადგენს, რაც ისტორიული მოვლენა იქნება.

უზენაეს სასამართლოში ვაკანტური თანამდებობა მას შემდეგ გაჩნდება, რაც სასამართლოს ლიბერალური ფრთის წარმომადგენელი, მოსამართლე სტივენ ბრეიერი ივნისში პენსიაზე გავა.

პენსიაზე გასვლის თაობაზე მოსამართლე ბრეიერმა რამდენიმე დღის წინ აუწყა საზოგადოებას.

ჯო ბაიდენის განცხადებით, ახალ მოსამართლეს თებერვლის ბოლოს წარადგენს. ბაიდენისთვის ეს პირველი შესაძლებლობაა, უზენაესი სასამართლოს მოსამართლე დაასახელოს.

მედიის ინფორმაციით, მთავარ პრეტენდენტებად 3 მოსამართლე განიხილება.

ქეტანჯი ბრაუნ ჯექსონი

51 წლის მოსამართლე ითვლება ყველაზე მაღალი შანსის მქონე კანდიდატად, რომელმაც შესაძლოა უზენაესი სასამართლოს მსაჯულის მანტია მოისხას.

ბრაუნ ჯექსონი დედაქალაქ ვაშინგტონი დაიბადა. ამჟამად ის აშშ-ის ფედერალური სააპელაციო სასამართლოს (კოლუმბიის ოლქი) მოსამართლეა. უზენაესი სასამართლოს 3 მოქმედი წევრი უწინ ამ სასამართლოში მსახურობდა.

მას აქვს ჰარვარდის უნივერსიტეტის ორი ხარისხი სამართალში. ერთ დროს მუშაობდა ჟურნალ Harvard Law Review-ს რედაქტორად. 

ჰარვარდში ყოფნისას ის მეთაურობდა საპროტესტო მოძრაობას სტუდენტის წინააღმდეგ, რომელმაც თავისი საერთო საცხოვრებლის ფანჯარაზე კონფედერაციის დროშა გამოფინა.

ჯექსონს ჰყავს ქმარი და ორი შვილი.

ლეონდრა კრუგერი

45 წლის მოსამართლე კალიფორნიის უზენაესი სასამართლოს მოსამართლეა.

დაიბადა იამაკელი ემიგრანტი ქალისა და ებრაელი კაცის ოჯახში. პასადენაში მცხოვრები კრუგერი ჰარვარდის უნივერსიტეტისა და იელის სამართლის სკოლის კურსდამთავრებულია. იელში ის იყო უნივერსიტეტის სამართლის ჟურნალის რედაქტორი. 

ობამას ადმინისტრაციის დროს, 2007-2013 წლებში კრუგერი იუსტიციის დეპარტამენტში მუშაობდა. ის აგრეთვე უზენაესი სასამართლოს (აწ გარდაცვლილი) მოსამართლე ჯონ პოლ სტივენსის თანაშემწედ მუშაობდა.

ჰყავს ადვოკატი ქმარი და ორი მცირეწლოვანი შვილი.

ჯულიანა მიშელ ჩაილდსი

55 წლის ჯულიანა მიშელ ჩაილდსი 2010 წლიდან სამხრეთ კაროლინის შტატის საოლქო სასამართლოს მოსამართლეა.

მანამდე ის შტატის პირველი ინსტანციის სასამართლოს მოსამართლედ მსახურობდა. დამთავრებული აქვს სამხრეთ კაროლინის უნივერსიტეტის იურიდიული სკოლა.

ცოტა ხნის წინ, ჯო ბაიდენმა ჯულიანა მიშელ ჩაილდსმა კოლუმბიის ოლქის სააპელაციო სასამართლოს მოსამართლედ წარადგინა.

სტატისტიკური მონაცემების თანახმად, შეერთებული შტატების ფედერალური სისტემის მხოლოდ 3%-ს შეადგენენ შავკანიანი ქალები. 

უზენაესი სასამართლო 9 მოსამართლისგან შედგება, ისინი თანამდებობაზე სიცოცხლის ბოლომდე რჩებიან. აშშ-ის უზენაესი სასამართლოს პირველი აფროამერიკელი მოსამართლე თორგუდ მარშალი იყო. 

1981 წელს რონალდ რეიგანმა მოსამართლედ დანიშნა პირველი ქალი უზენაესი სასამართლოს ისტორიაში - სანდრა დეი ო’კონორი. 2009 წლის აგვისტოში უზენაესი სასამართლოს წევრად პირველად დანიშნეს ლათინოამერიკული წარმოშობის სონია სოტომაიორი.