დღეს, ეკონომიკისა და მდგრადი განვითარების სამინისტროში ხელი მოეწერა შეთანხმებას "საქართველოს მთავრობასა და დიდი ბრიტანეთისა და ჩრდილოეთ ირლანდიის გაერთიანებული სამეფოს მთავრობას შორის საჰაერო მომსახურების შესახებ".
აღნიშნული დოკუმენტით შეზღუდვები იხსნება ორივე ქვეყნის ავიაგადამზიდავების რაოდენობაზე, ფრენების სიხშირესა და დანიშნულების პუნქტებზე.
როგორც ეკონომიკისა და მდგრადი განვითარების მინისტრმა ვერა ქობალიამ განაცხადა, აღნიშნული ხელშეკრულების გაფორმებით ბაზარზე კონკურენცია გაიზრდება, რაც შემდგომ ფრენების ტარიფებს გააიაფებს.
"შეთანხმება მნიშვნელოვანია იმით, რომ იქმნება ლიბერალიზაცია ამ სფეროში, რაც ნიშნავს იმას, რომ აბსოლუტურად ყველა ავიაკომპანიას შესაძლებლობა ექნება, იფრინოს ბრიტანეთიდან საქართველოში და საქართველოდან ბრიტანეთში. ნებისმერ ქართულ და ბრიტანულ ავიაკომპანიას საშუალება ეძლება, ასევე, შიდა რეისები განახორციელონ ბრიტანეთსა და საქართველოში.
შეთანხმების თანახმად, ქართულ ავიაკომპანიას საშუალება ეძლევა ლონდონიდან ედინბურგში გადაფრინდნენ, რაც ამ სფეროში კონკურენციას შექმნის და დაარეგულირებს ტარიფებს",- განაცხადა ვერა ქობალიამ.
მინისტრის თქმით, აღნიშნული რეისების შესრულებით ავიაკომპანიებიდან ინტერესი არსებობს.
"ამ რეისების ათვისებით დაინტერსება არის, თუმცა გარკვეული დროა საჭირო, რათა ახალი ავიაკომპანიები დაინტერესდნენ",- აცხადებს ქობალია.
ეკონომიკისა და მდგრადი განვითარების სამინისტროს ინფორმაციით, ხელმოწერილი დოკუმენტი ავიაგადამზიდავებს საშუალებას აძლევს საკუთარი შეხედულებით განსაზღვრონ მომსახურეობის ტარიფი.
შეთანხმება განსაკუთრებულია იმითაც, რომ ორი ქვეყანა ერთმანეთს აძლევს კაბოტაჟის შესაძლებლობას, რაც შიდა გადაზიდვების განხორციელების უფლებას ნიშნავს.
ამასთან, ავიაკომპანიებს შორის კონკურენცია გაზრდის მომსახურეობის ხარისხს, შეამცირებს ბილეთის ფასსა და ყოველივე ეს პოზიციურად აისახება, როგორც ზოგადად მგზავრთა ნაკადის, ისე საქართველოში ჩამომსვლელი ტურისტების ზრდის დინამიკაზე.
შეგახსენებთ, რომ რამოდენიმე დღის წინ საქართველოს ეკონომიკისა და მდგრადი განვითარების სამინისტროში ხელი მოეწერა ხელშეკრულებას "საქართველოს მთავრობასა და ჩეხეთის რესპუბლიკის მთავრობას შორის საჰაერო მიმოსვლის შესახებ".
აღნიშნული დოკუმენტი წარმოადგენს ლეგალურ ბაზას ქართული და ჩეხური ავიაკომპანიებისათვის, რათა მათ განახორციელონ საჰაერო მიმოსვლა ორ ქვეყანას შორის. ხელშეკრულება ორივე ქვეყნის ავიაკომპანიებს საშუალებას მისცემს, რეისები განახორციელონ წინასწარ დადგენილი კვოტების გარეშე. ამასთან, საქართველოსა და ჩეხეთის რესპუბლიკას შორის ფრენის რეჟიმის ლიბერალიზება, რის გარანტიასაც ხელმოწერილი დოკუმენტი იძლევა, საშუალებას მისცემს ავიაკომპანიებს, საკუთარი შეხედულებით განსაზღვრონ ფრენის სიხშირე და მომსახურების ტარიფი.
