ჩვენ მსოფლიო გვიყურებს, როგორ მოვიმოქმედებთ, რას გავაკეთებთ პრეზიდენტის, როგორც სიმბოლოს მიმართ, - თქვა მომღერალმა თამარ ჭოხონელიძემ თავისუფლების მოედანზე ენმ-ს მიერ ორგანიზებულ აქციაზე სიტყვით გამოსვლისას.
„ნახეთ, რას აკეთებს რუსეთი, ნახეთ, როგორ დაგვცინის რუსეთი, ნახეთ, როგორი ბედნიერია დღეს რუსეთი, რომ ჩვენ ასეთი პოლარიზებულები ვართ. ნახეთ, რა ბედნიერად ქირქილებენ, რომ ჩვენ არასდროს ვყოფილვართ დამოუკიდებლები, რომ ჩვენ არ ვართ ერი, რომ ჩვენ უნდა ვიყოთ ისევ გუბერნია. ეს გინდათ ქალებო?! ქალებო, რომლებიც დედები ხართ და შვილებს ზრდით? ამ სულისკვეთებით გამსჭვალავთ თქვენს შვილებს? მიხეილ სააკაშვილის მიმართ მე რომ მქონდა პრეტენზია, ერთ-ერთს, როგორც რიგით მოქალაქეს, მე არ ვიცი, ბევრს ჰქონდა ალბათ, მაგრამ მე ნამდვილად მქონდა. მქონდა და დღესაც მაქვს ძალიან ბევრი შეკითხვა, მაგრამ დღეს ამის დროა? ქვეყანა დაცემის პირას დგას. ჩვენ მსოფლიო გვიყურებს, როგორ მოვიმოქმედებთ, რას გავაკეთებთ პრეზიდენტის, როგორც სიმბოლოს მიმართ. როგორც არ უნდა მოგვწონდეს, ქვეყნის სიმბოლოა როგორც დროშა, ჰიმნი. ერთი პრეზიდენტი უკვე მოვკალით, მოვახერხეთ ეს ყველაფერი“, - თქვა ჭოხონელიძემ.
"ნაციონალური მოძრაობა" თავისუფლების მოედანზე აქციას მართავს - მთავარი მოთხოვნა მიხეილ სააკაშვილის გათავისუფლებაა. პარტიამ მობილიზება მთელი ქვეყნის მასშტაბით გამოაცხადა - დილიდან თბილისის ცენტრისკენ სხვადასხვა რეგიონიდან ავტოკოლონებით ჩამოვიდნენ.
