"ევროპული საქართველოს" ლიდერი გიგა ბოკერია "რადიო თავისუფლებასთან" საუბარში ევროკავშირის ოფისის წინ ნიკა მელიასა და ირაკლი კობახიძეს შორის მომხდარ დაპირისპირებას აფასებს.
ბოკერიას განცხადებით, ის არ მოიქცეოდა იმგვარად, როგორც მელია, "თუმცა ყველაფერი უნდა ჩავსვათ კონტექსტში".
"მე ასე არ მოვიქცეოდი. მე არ ვარ მომხრე ასეთ რეჟიმთანაც კი ამ ტიპის ჟესტების, თუმცა ყველაფერი უნდა ჩავსვათ კონტექსტში... ზოგჯერ ეს შეიძლება გახდეს მიზეზი, რომ ნერვებმა უმტყუნოს პოლიტიკოსს, მარა არ უნდა უმტყუნოს", - განაცხადა გიგა ბოკერიამ.
მისივე განცხადებით, წინასაარჩევო პერიოდში სხვადასხვა ინციდენტი, ისეთივე როგორც დმანისის შემთხვევა, გასულ წლებშიც მრავლად მომხდარა, მაგრამ ისინი დღემდე გამოუძიებელია.
"ასეთი შემთხვევები არის უამრავი და ამას უპირისპირებს ივანიშვილის რეჟიმი პუტინისტური სტილის უტიფარ პროპაგანდას...როგორ შეიძლება ოპოზიციურ პარტიას შეხვედრა ჰქონდა და ვიღაც მიუვარდა და დაჭრა და მას დააბრალო ეს. ხო აბსურდია. მიუხედავად ამისა, მე ასე არ მოვიქცეოდი, მარა ჩვენს ქვეყანაში თუ რამე არის პრობლემა, მთავარი პრობლემა არის ის კონტექსტი და ის ფონი, რაზეც ვისაუბრე და არა თუნდაც რომელიმე პოლიტიკოსის, რომელსაც მე მხარს ვუჭერ ამ შემთხვევაში, ჩემთვის, ჩემი აზრით, შეუფერებელი საქციელი", - განაცხადა გიგა ბოკერიამ.
23 სექტემბერს ევროკავშირის წარმომადგენლობის ოფისთან მელია და კობახიძე ერთმანეთს სიტყვიერად დაუპირისპირდნენ. მელიამ კობახიძეს "ივანიშვილის მონა, უნამუსო" უწოდა, კობახიძემ კი მელიას - "ნაძირალა".